DILI, STLTIMORLESTE.com – Sekretariu Jeral Partidu FRETILIN, Mari Alkatiri husu membru Komite Sentral FRETILIN neebe hakarak kandidatu aan ba Prezidente Republika (PR) periodu 2027-2032 husi dalan indepedente, tenki entrega kartaun militante FRETILIN.
Alkatiri rekonhese FRETILIN hanesan partidu boot ida, neebe ke iha kuadru no ema matenek tan nee ema hotu-hotu hakarak kandidatu aan ba Prezidente Republika.
Maibe tuir nia, tuir estatutu Partidu FRETLIN nian atu deside kandidatu Prezidente Republika tenki liu kongresu ida, no too agora FRETILIN seidauk deside atu kandidatu membru CCF balun ba iha Prezidente Republika.
Nia dehan, se membru Komite Sentral FRETILIN ida mak hakarak deside kandidatu aan Prezidente Republika liu husi dalan indepedente mak obrigatoriu, tenki entrega fila fali kartaun militante.
“Hau husu deit sira dehan kandidatu independente nee atu entrega kartaun, nee mak hau husu ba sira, se indepedente duni intrega kartaun,” hatete nia ba jornalista sira iha edifisiu eis Gabinete Farol, Kuarta, (08/04/2026).
Nia hatutan, hanesan Sekretariu Jeral Partidu FRETILIN nian, nia sei simu fali kartaun militante wainhira membru CCF balun iha duni seriedade atu kandidatu aan ba Prezidente Republika.
“Laos kaer metin kartaun nee, hodi dehan kandidatu Prezidente indepedente. Intrega kartaun, hau la iha problema, se intrega hau simu,” adianta nia.
Lider nasional nee ho hamnasa akresenta katak, Komite Sentral FRETILIN seidauk deside atu kandidtu se, inklui Lere Anan Timur, tanba liu husi kongresu nasional foin bele deside atu kandidatu se.
“Ami sei loke konkursu ba ida nee, hau nia gabinete mak sei loke konkursu ba ida nee, hau dehan laos hau mak deside kandidatu maibe komite sentral mak sei deside,” dehan nia.
(alb)
