DILI, STLTIMORLESTE.com – Sekretariu Jeral Partidu FRETILIN, Mari Alkatiri hatete, Sua Santidade Papa Francisco husik hela eransa atu hateke ba mundu ho vizaun foun, no Papa nuudar mensajeiru ba Fraternidade Umana.
Eis Primeiru Ministru, Mari Alkatiri hatoo lia hirak nee liu husi nia mensajen neebe publika iha nia pajina facebook Segunda kalan (21/04/2025).
Nia hatete, mundu tomak sente lakon boot tanba lakon lider kreda katoliku ida ho hanoin, hafoun klean tebes ba dame.
SekJer Mari dehan, Papa Francisco hakotu iis iha loron Segunda, no sua Santidade Papa Francisco husik hela eransa hodi hateke ba mundu ho vizaun foun.
“Papa Francisco husik mai ita eransa ida atu hahu hateke ba mundu ho vizaun foun no diferente. Papa nuudar mensajeiru ba Fraternidadi Umana, Solidariedadi nebee ema hotu-hotu merese tratamentu hanesan ho direitu hanesan ba Justisa, hakotu nia jornada ba libertasaun ba umanidade tomak ohin,” katak Eis Primeiru Ministru nee.
Mari dehan, Mundu tomak lakon lider kreda katoliku ida ho hanoin, hafoun klean tebes ba dame no ba salvasaun umanidadi tomak, rohan laek.
“Papa Francisco hili dalan foun ho obstakulus oin-oin atu bele loke dalan boot ba hamihis diferensas atu bele sai fundasi ba harii mundu ida ba ema hotu, kaer ba ida nee, iha teoria no pratika ekumeniku iha mundu relijuaun nian. Tanba nee duni, mundu tomak hatais ohin Luto,” katak nia.
Nia haktuir tan katak, Amu Papa sai mensajeiru Fraternidade Umana, Solidariedade, Igualdade no Justisa ba ema hotu, kompleta ona ninia viajen libertador.
Mundu tomak lakon Líder Igreja Katolika ida ho preokupasaun klean ba Paz no Salvasaun Umanidade nian iha nia estensaun tomak.
(eme)
