DILI, STLTIMORLESTE.com – Ministeriu Edukasaun (ME) liu husi INFORDEPE kada tinan aloka orsamentu ba formasaun profesores sira.
“ME liu husi INFORDEPE kada tinan aloka orsamentu ba formasaun profesores, mezmu profesor foun ou formasaun kontinua, agora depende ba ptofesor sira, depois de formasaun sira uza duni materia de formasaun iha prosesu aprendizajen ka lae, nunee mos tenke hasae disiplina dos profesores. Ita halo observaun ba sala aprendizajen neebe mak diak, servisu inspesaun nia,” dehan Ministra Eduksaun (ME), Dulce de Jesus Soares ba jornalista sira iha City 8 Manleuana, Sesta nee (24/04/2026).
Entretantu Diretor Nasional Ensinu Sekundariu iha ME, Benjamin Gomes da Cruz Fernandes hatete, durante nee profesores sira neebe hanorin iha nivel sekundariu nee sira hetan formasaun kada tinan husi INFORDEPE.
“Hau hanoin kada tinan nee ita nian profesores sira partisipa formasaun kona-ba lingua português, nee husi INFORDEPE mak fo ba sira, dadus kompletu nee ita boot sira bele foti iha INFORDEPE, tanba sira mak iha dadus neebe kompletu,” dehan Benjamin.
Nia dehan, nee duni liu husi formasaun lian português neebe profesor sira tuir iha progresu neebe diak, hodi nunee sira bele uza lingua nee ba iha prosesu ensinu aprendizajen ba estudantes sira, tanba formasaun nee importante tebes hodi bele aumenta konhesimentu profesores sira.
Nunee mos Diretor Eskola Sekundáriu Jeral 10 Dezembru Komoro, Manuel Verdial dehan, formasaun lian português ba profesores sira nee importante tebes, tanba nee Ministériu relevante nafatin fo formasaun ba profesores sira.
“Hau hanoin formasaun lian português ba ita nian profesores sira nee importante tebes, tanba nee Ministériu relevante nafatin fo formasaun ba profesores sira, ho nunee ita nian profesores sira iha konhesimentu diak liu tan ba lian ida nee,” nia esplika.
(jac)
