DILI, STLTIMORLESTE.com – Viajen servisu membru Governu nian ba rai liur neebe lori tempu too semana rua resin, kontinua foti kestionamentu boot husi klas politika no akademista konaba efisiensia gastu publiku. Kustu viajen neebe boot husi osan estadu nee, presiza fiskalizasaun rigorozu liu hodi garante nia rezultadu lo-loos bele fo benefisiu ba dezenvolvimentu nasional.
Kritika nee hatoo husi Visi Prezidente Partidu Libertasaun Popular, Asuntu Orgaun Asosiadu no Movimentu (PLP), Amilcar dos Reis Araujo “Hatenu” ba STL, iha ninia rezidensia Manleuana, Dili, Kuarta (01/07/2026).
Politiku PLP nee kestiona katak, iha situasaun sosioekonomiku neebe kondisaun estrada, bee moos, saude, edukasaun no nesesidade povu nian barak mak seidauk rezolve, gastu ba viajen neebe boot resin presiza justifikasaun neebe klaru.
“Kustu viajen membru Governu mahar loos iha rai liur, lori tempu too semana rua resin. Publiku presiza hatene osan neebe fakar sai lori fali benefisiu loloos neebe klaru ba povu ka lae. Parlamentu Nasional labele nonok, tenke duni fiskalizasaun hodi husu relatoriu no detalhu gastu hotu husi viajen hirak nee,” hatete Amilcar.
Aleinde nee Politiku PLP nee mos husu katak, transparensia hosi Governu ba osan neebe gastu ona nee importante tebes, hodi hatudu responsabilidade moral nuudar servidor povu nian. Nia konsideira katak efisiensia ba osan publiku tenke sai prioridade boot, hodi bele foka liu dezenvolvimentu iha baze.
Iha parte seluk Akademista UNTL, Jose Soares mos hatoo nia preokupasaun konaba kestaun nee hodi sublina katak, uza osan Estadu ba viajen rai liur tenke bazeia ba nesesidade neebe urjenre no labele fakar deit osan ba formalidade neebe la lori impaktu dezenvolvimentu loloos ba rai laran.
“Hau hanoin katak Governu presiza halo avaliasaun klean ba viajen sira nee hotu. Osan Estadu neebe fakar sai ba rai liur neebe boot tebes, loloos nee uza fali ba sosa medikamentu iha ospital sira, hadia eskola neebe aat no seluk tan,” hatete Jose.
Entretantu, too deit notisias nee publika husi Media STL, seidauk hetan resposta ruma ka klarufikasaun ofisial hosi parte Governu nian konaba kestaun hirak nee.
(car)
