DILI, STLTIMORLESTE.com – Vise Prezidente Partidu Libertasaun Popular (PLP) ba Asuntu Orgaun Asosiadu no Movimentu Nasional, Amilcar Araujo dos Reis “Hatenu” hatete, Governu labele nega realidade kiak povu nian ho numeru estatistika, tanba povu mak kiak no sente hamlaha loron-loron, laos ema sira ne’ebé moris iha AC laran.
Deklarasaun ne’e hato’o, relasiona ho dadus ofisial ne’ebé indika kiak tun husi 41,7% ba 37%.
“Kiak ne’e realidade. Povu mak sente, povu mak hasoru loron-loron. Ukun nain sira ne’ebé bosu riku, moris iha AC laran, kareta boot, la hatene oinsa hamlaha. Tanba sira la hatene hamlaha, sira dehan lae, ita la kiak. Sira hanoin ema dehan PM ho membru Governu mak kiak. Lae. Povu mak kiak. Povu mak kiak laos ema AC laran,”Nia hatete ba STL, iha Díli, Kuarta (23/06/2026)
Amilcar hatete, dadus ne’e la reflete kondisaun real povu nian iha baze.”ta kiak mais halo an hanesan ema riku. Diak liu ita simu katak ita kiak, duke halo an hanesan riku iha espelhu nia oin,” Amilcar hatutan.
Nia mos kestiona metodolojia levantamentu dadus ne’e.”Dadus ne’e mai husi ne’ebé. Se foti duni husi povu ka lae. Ita tun ba aldeia iha Ainaro, tun ba toos iha Ermera, ba hasoru povu iha tos laran. Ita ba hasoru povu ke rai henek iha mota Komoro, ba tasi ibun iha Atauro. Sira sei dehan sira riku ona ka lae. Sira sei dehan moris susar nafatin,” nia dehan.
Tuir nia, povu iha liña kiik sei hasoru susar moris loron-loron. “Povu moris iha lina kiik. Povu sei dehan mina folin sae, fos folin sae, oan laiha servisu. Osan laiha. Dadus ne’ebé foti ne’e husi riku sira iha Dili deit. La os dadus husi povu iha suku rural no aldeia rural sira,” nia afirma.
Nia konsidera sistema ne’e la justu, tanba Estadu la tau matan ba povu kiik maibé reaajen makaas bainhira, Banku Mundial publika relatóriu kona-ba kiak iha Timor-Leste ho porsentajen 41,7% no Governu husu Banku Mundial atu husu deskulpa.
“Oinsa, ita deve ema nia osan, ema hatene ita nia kondisaun, maibé ita la simu realidade, ne’e hanesan ema kiak ida ba banku husu kreditu, maibé dehan ba banku hau riku hela,” nia dehan.
Amilcar sita fali liafuan Fundador PLP, Taur Matan Ruak katak, Bosu riku la hatene hamlaha.”Diak liu ita simu kiak duke halo an hanesan riku iha espelhu nia oin. Simu katak ita sei kiak. Ne’e la os moe. Moe mak halai husi realidade,” nia subliña.
Iha parte seluk, Observador Politika, Manuel da Silva, konkorda ho kritika ne’e. Nia dehan, dadus estatistika tenki refleta realidade povu nian, laos atu hadiak deit imajen Governu nian.
“Amilcar koalia los. Povu mak hatene sira kiak ka lae, laos dadus iha AC laran. Governu tenki tun ba baze, rona povu, laos defende numeru deit. Diak liu simu realidade hodi buka solusaun, duke nega kiak hodi bosok an,” Manuel subliña.
Entretantu, Akademista UNPAZ, Samuel Soares, hatete Governu labele halo negasaun ba realidade kiak, maibé tenki buka meius hodi kombate.
“Se ita nega kiak, ita sei la buka solusaun. Universidade haree estudante barak mai husi familia kiak, la konsege selu propina. Ne’e faktu. Dadus tenki mai husi baze, laos husi gabinete. Governu presiza politika pro-povu, fo subsidiu no kria kampu servisu, laos debate numeru deit,” nia hatete.
(car)
