DILI, STLTIMORLESTE.com — Vise Prezidente Partidu Libertasaun Popular (PLP) ba Asuntu Orgaun Asosiadu no Movimentu Nasional, Amilcar Araujo dos Reis Hatenu hatoo kritika makaas hodi dehan katak governu hapara subsidiu povu hodi fahe mina goreng ba militante, tanba desizaun orsamental ka finansial hirak nee la fo prioridade ba interese povu nian.
Nia avalia katak desizaun nee nuudar hahalok ida neebe hanehan fali povu kiik, tanba iha sorin seluk governu hapara fali subsídiu ba povu no hamosu duvida katak orsamentu estadu sei uza deit hodi fo benefísiu ba militante partidu laran.
Kritika nee hatoo husi Amilcar Araujo dos Reis hodi hatan ba informasaun no alokasaun fundu publiku neebe too ona iha publiku nia oin.
Nia sublinha katak, iha tempu difisil neebe povu moris ho sakrifísiu no presiza apoiu direta husi Estadu, governu foti fali desizaun hodi fo prioridade ba interese grupu no partidariu nian.
“Governu tenke iha transparensia no labele uza osan publiku hodi fo benefísiu deit ba ema balun ka grupu politiku nia interese. Hapara subsidiu ba povu no depois aloka osan boot ba kompanhia privadu nee hahalok ida neebe laiha inosensia no hakanek povu nia sentimentu,” dehan Amilcar Araujo dos Reis ba STL iha Dili, Kuarta nee (05/08/2026).
Amilcar Reis dehan, situasaun nee hamosu preokupasaun makaas husi sosiedade sivil no parseiru dezenvolvimentu sira, tanba alokasaun orsamentu neebe boot la reflete prioridade lo-loos hodi rezolve kbiit-laek no pobreza rural, maibe kontribui liu fali ba konsentrasun kapital iha kompanhia privadu sira neebe iha ligasaun politiku.
Iha parte ketak Observador Politiku, José da Silva hateten katak, desizaun sira neebe hamosu polemika hanesan nee bele estraga konfiansa publiku ba instituisaun estadu nian, tanba nee governu tenke iha responsabilidade no esplika klaru destinu orsamentu hodi evita akuzasaun nepotizmu ka favoritizmu iha alokasaun fundu publiku.
“Ita hotu hatene katak fundu estadu nian tenke uza lo-loos ba dezenvolvimentu nasional no laos ba interese partidariu, tanba nee fiskalizasaun husi parseiru no povu mak sai hanesan dalan prinsipál atu garante hahalok hirak nee la akontese iha futuru,” dehan nia.
Nunee mos Akademista husi Universidade da Paz (UNPAZ), Daniel Soares haktuir katak, alokasaun fundu ho valor boot ba kompanhia privadu iha tempu neebe povu moris iha liña susar nia laran hatudu katak governu nia prioridade dezenvolvimentu seidauk foka loos ba bem-estar sosial, nunee presiza duni mekanizmu kontrolu neebe metin hosi Parlamentu Nasional atu proteje osan Estadu nian.
Entretantu too notisias nee STL publika, parte governu seidauk fo esklaresimentu ofisial ruma ba publiku, relasiona ho preokupasaun neebe hatoo husi Visi Prezidente Partidu Libertasaun Popular (PLP), ba Asuntu Orgaun Asosiadu no Movimentu Nasional nee.
(car)
