DILI, STLTIMORLESTE.com – Ministru Defeza Kontra Almirante Donaciano do Rosário Gomes “Pedro Klamar Fuik,” hateten, Mnistru Defeza Angola, Joao Ernesto dos Santos hatoo protidaun kontinua haforsa kooperasaun militár ho Timor Leste (TL).
“Hanesan ita boot sira hatene katak, Angola País amigo, País irmao iha ita nia istória independensia iha pasadu, sempre hamutuk ho ita, tulun ita depois independensia mós sempre hamutuk ho ita tulun ita fo apoiu estabelese kooperasaun ba dezenvolvimentu ba forsa armadas nian,” hatete Ministru Defeza Kontra Almirante Donaciano do Rosário Gomes “Pedro Klamar Fuik”ba jornalista sira, hafoin simu audiénsia Ministru Defeza Angola, Joao Ernesto dos Santos iha sala enkontru Bilaterál Ministeriu Defeza Fatuhada, Segunda (01/06/2026).
Nia dehan, prezensa Ministru Defeza Angola, Joao Ernesto dos Santos mai Timor Leste ho objetivu atu partisipa enkontru reuniaun Ministru Defeza ba dala-25 neebe halao iha Dili.
“Señor Ministru mai fila- fali iha okazisaun ida nee partisipa iha reuniaun”, nia informa.
Nia deklara, iha okaziaun ho nia omologu hodi diskute kona-ba renovasaun portofoliu kuadru kooperasaun Angola no Timor Leste neebe iha ona.
“Haree fila-fali mos portofoliu relasiona ho kooperasaun neebe mak sei haree, sei asina iha tempu badak ba kooperasaun entre rai rua entre Timor Leste ho Angola,” nia koalia.
Iha fatin hanesan, Ministru Defeza Angola, Joao Ernesto dos Santos informa, nia too iha Dili horiseik hodi partisipa runiaun Ministru Defeza CPLP dala rua nulu resin lima nian, no mos atu halo diálogu ho Forsa Armada Timor Leste, lo-loos nian ho Ministériu Defeza.
“Iha enkontru ohin nee ami koalia konaba halo revizaun ba akordu kooperasaun neebe iha ona, tanba tempu liu tiha ona. Ita hotu hatene dinamika moris nian no mos situasaun jeopolítika internasionál neebe muda hela. Nunee ami iha obrigasaun atu aserta ami nia pasu atu nunee labele husik ami iha kotuk,” nia deklara.
Nia hatutan, iha akordu kuadru kooperasaun militar Angola ho Timor Leste define fali buat sira neebe presiza atu hadia.
“Hafoin nee, pasa ba implementasaun atu diak ba ami nia povu, ami-nia integridade teritorial no ba komunidade povu sira neebe koalia lian Portugés,” nia afirma.
(jen)
