VENILALE, STLTIMORLESTE.com – Idozu António Mira Belo nia oan feto tanis, hafoin simu uma foun ida husi ekipa Fundasaun Raan Amigo Kariedade (FURAK) neebe lideradu husi Januario Soares, iha Aldeia Wai-Tunau, Suku Uma Ana Iku, Postu Administrativu Venilale, Munisipiu Baukau.
Uma neebe ekipa FURAK konstrui ho medida 4X6 sufisiente ba kuarta toba fatin rua inklui varanda ida, janenal ida, odamatan rua iha neebe konstrusaun hahu iha loron 05 Maiu nee no entrega ona ba idozu António Mira Belo ho nia oan feto Felisberta Pereira Belo iha loron 09 Maiu nee ho fasilidade sira hanesan kulsaun rua, sumasu, manta, roupa, armariu, bikan, kanuru, kaneka, kopu, sana, tasu, rak, roupa, sandal, inklui sasan nesesidade bazika sira hanesan fos, mina tein no seluk tan.
Iha ambitu sesaun entrega uma direita husi Dirijeten FURAK, Januario Soares ba idozu António Mira Belo ho nia oan feto Felisberta Pereira Belo simu ho matan been.
“Ami rua tur diak ona maun sira ajuda ami rua, husu agradese nain feto bunda Maria husu agradese ba Aman Maromak Jesus Kristu neebe bantu ona amu sira hatoo sasan barak ba ami rua, hau husu agradese barak ba Maun Janu ami rua labele selu maibe ikus Maromak selu ba maun sira,” Felisberta Pereira Belo hateten ba Januario Soares ho matan been iha sesaun ambitu entrega uma iha Wai-Tunau, Sabadu (09/05/2026).
Idozu António Mira Belo nia oan feto Felisberta Pereira Belo hamonu matan bee no agradese ba ekipa FURAK neebe lideradu husi Januario Soares, tanba antes nee sira nain rua hela iha uma kondisaun taka ho nuu tahan didin ho au la dirasaun tinan tolu iha neebe tempu udan sira nain rua iha deit udan laran.
Maibe hafoin hetan publikasaun husi Media Suara Timor Lorosa’e no Radio Televizaun Timor-Leste ekipa FURAK too sidadaun nain rua refere nia fatin konstrui uma ba sira, neebe fundus ba konstrusaun mai husi trabalhodor Timor oan sira iha diaspora.
“Maun alin senor senora sira servisu iha rai liur dala ruma bantu ami rua karik hau husu agradese no obrigado barak ba sira, dala ida tan agradese barak ba Maun Janu,” Idozu nia oan feto nee hateten ho matan been iha Januario Soares nia oin.
Iha fatin hanesan fundador FURAK Januario Soares komenta, apoiu uma ba familia neebe prezisa inklui idozu António Mira Belo ho nia oan feto, ekipa FURAK laos buka oin no previleziu husi Governu, maibe inisiativa rasik atu ajuda familia vuneravel sira neebe presiza tulun.
“Laos buka previleziu maibe ita buka dalan atu ajuda maluk Timor oan sira vuneravel tanis ho matan been tanba sira hela iha udan no anin nia laran, ita la fo sala ba ema ida maibe familia neebe prezisa ita tulun,” Januario Soares hateten.
Nia rekonhese, uma neebe oferese ba idozu António Mira Belo ho nia oan feto simples, maibe ajuda familia ida hela iha mahon neebe seguru.
Nia sublina, ajuda husi ekipa FURAK la prefere ba ema hotu hotu, maibe prioridade ba familia neebe vuneravel liu iha neebe haluhan husi Governu no familia rasik.
“Hau nia moto mak nee, riku hela ba imi kiak fo mai hau,” Januario Soares komenta.
Enkuantu Xefe Aldeia Wai-Tunau Fonsiano Domingos da Conceição Belo louva ekipa FURAK neebe lideradu husi Januario Soares, tanba sei iha Timor oan neebe laran luak ajuda familia vuneravel sira neebe prezisa tulun.
“Iha nee laiha buat barak mean murak fo ba maun Janu, maibe hau reprezenta familia ida nee ho orasaun ba Mate bian sira ajuda maun Janu servisu nee diak liu no boot liu tan,” Fonsiano argumentu.
Entretantu iha serimonia entrega uma nee hetan partisipasaun masimu husi Idozu António Mira Belo nia familia no vizinhu sira akompanha husi Xefe Aldeia Wai-Tunau.
Tuir planu mos, idozu António Mira Belo ho nia oan feto Felisberta Pereira Belo sei hetan tan uma foun ida husi Prezidente Republika (PR) José Ramos Horta.
(tom)
