AMBENO, STLTIMORLESTE.com — Autoridade Protesaun Civil (APC) hamutuk ho F-FDTL halo intervensaun koa ai hun boot maran iha Jardim Oebau, Oecusse, atu prevene risku ba komunidade no movimentu públiku.
APC liuhusi Departamentu Bombeirus, hamutuk ho FALINTIL-Forsa Defeza Timor-Leste (F-FDTL), halo intervensaun ba ai hun boot tranbesi ne’ebé maran ona iha área Jardim Oebau, Suku Costa, Postu Administrativu Pante Macassar, RAEOA.
Komandante Bombeirus Oecusse, Moizes Tinus Colo, dehan ai hun ne’e tuan no maran ona, no lokaliza besik estrada públika, jardim no edifísiu Banking Payment Authority (BPA) RAEOA.
Nia ko’alia ba STL iha Bairro Oebau, Segunda-feira (14/09/2026), katak ai hun ne’e besik Monumentu Soldadu Koreanu Na’in Lima, no nia kondisaun bele fó risku ba komunidade, liuliu bainhira akontese anin boot.
“Ohin ami halo intervensaun ba ai hun boot tranbesi ne’ebé maran ona, tanba bele ameasa komunidade ne’ebé halo movimentu ho transporte públiku no privadu. Ai hun ne’e mos besik edifísiu BPA RAEOA, tanba ne’e ami koa tiha atu prevene risku,” dehan Moizes.
Nia haktuir katak, APC mos hahu fó alerta ba komunidade kona-ba posibilidade anin boot durante semana ida, bazeia ba informasaun husi autoridade meteorolojia no geofízika.
APC husu komunidade ne’ebé hela besik ai hun boot no tasi-ibun atu aumenta kuidadu no ses husi área ne’ebé konsidera risku, atu prevene posibilidade dezastre.
“Ami alerta komunidade Atoni Oecusse atu kuidadu-an husi ai hun boot sira no fatin besik tasi-ibun, tanba anin boot bele halo ai maran monu no fó risku ba vida ema,” afirma Moizes.
Kona-ba kapasidade atendimentu, Moizes dehan Departamentu Bombeirus APC iha Oecusse prontu atu responde bainhira komunidade presiza intervensaun.
Nia esplika katak, ai hun boot ne’ebé aas no maran kleur presiza koa ho kuidadu, husi leten tun mai to’o ai nia hun, atu prevene ai monu ne’ebé bele hamosu dezastre.
Diretor Rejional Servisu Protesaun Civil RAEOA, Jose Tanesib Anuno, dehan nia akompanha ekipa Bombeirus no Forsa Naval F-FDTL hodi halo intervensaun.
Nia dehan tempu bailoron, husi fulan Juñu to’o Setembru, dala barak akontese anin boot iha fatin-fatin, inklui RAEOA. Tanba ne’e, intervensaun presiza halo sedu atu prevene dezastre.
“Ohin koa ai boot ne’e tanba hetan orientasaun husi Prezidente RAEOA. Ai ne’e nia sanak maran ona no bele afeta vida ema tanba hela besik estrada,” afirma Jose Tanesib.
Nia mos subliña katak Jardim Oebau mak fatin públiku ne’ebé ema barak vizita loron-loron. Tanba ne’e, ai boot ne’e presiza koa atu labele monu no fó risku ba ema.
Jose haktuir katak, semana kotuk nia orienta ona funsionáriu APC atu prepara ekipamentu no halo intervensaun tuir orientasaun autoridade.
Iha parte seluk, Jerente Companhia Pax, Gores Coa, dehan hafoin ekipa Protesaun Civil no Bombeirus halo intervensaun, Companhia Pax responsabiliza ba limpeza área no estrada públika.
“Ohin ami hamutuk ho trabalhador sira mai tula hasai ai hun boot ne’ebé monu iha estrada públika no hamoos estrada. Ami nia knaar mak asegura sidade Oecusse tenke moos tuir kontratu ho Autoridade,” dehan Gores.
Tuir observasaun STL iha Jardim Oebau, ekipa Bombeirus hamutuk ho F-FDTL konsege halo intervensaun koa ai hun boot ne’ebé konsidera fó risku ba komunidade, ho apoiu husi komunidade ne’ebé hela besik área ne’e.
(jos)
