BAUCAU, STLTIMORLESTE.com – Sekretaria Estadu Protesaun Sivil sei orienta hikas ekipa verifikador husi Autoridade Protesaun halo levantamentu ba vitima dezastre naturais 100 resin husi Munisipiu Bauca inklui mos Xefe Suku Ueru-Mata iha Postu Administrativu Laga, neebe naran elimana iha lista material rekuperasaun tinan 2026.
Sekretaria Estadu Protesaun Sivil, Joaquim Gusmão aprezenta, bazeia ba lista vitima dezastre naturais neebe uma hetan estragus iha Baucau husi APC Baucau ba Nasional hamutuk 300 resin, maibe hetan eliminasaun 100 resin iha lista material rekuperasaun 2026, tanba entemus tenkniku neebe halao husi verifikador sira, maibe Sekretariu Estadu Protesaun Sivil simu ona kestaun husi Autoridade Suku, tanba nee sei halo levantamentu.
“Orsida sei hatuun fali despashu ba ekipa re-verifikasaun halo fali levantamentu hamutuk ho Xefe Suku, Xefe Aldeia OPS sira haree fali nia nee merese duni simu ga lae, se nia uma insendiu nia merese duni atu simu,” hateten Sekretaria Estadu Protesaun Sivil, Joaquim Gusmão ba jornalista sira hafoin remata sesaun distribui material rekuperasaun no fundu mão de obra ba vitima DN 185 iha Baucau, Kuarta (10/06/2026).
Nia informa, ekipa re-verifikasaun husi APC sei tuun terrenu halo levantamentu dadus ba vitima dezastre naturais 100 resin neebe naran elimina husi lista iha tempu badak bainhira remata ona servisu distribuisaun material rekuperasaun ba vitima dezastre naturais hamutuk 185.
Maibe levantamentu refere laos halao deit husi ekipa re-verifikasaun husi APC, maibe sei hamutuk ho Autoridade Suku kompostu Xefe Suku, Xefe Aldeia no OPS nunee bele hatene fukun loloos. Tanba regras ba apoiu material rekuperasaun neebe iha, mezmu vitima sira hetan insedensiu, maibe insendiu refere afeta ba kioske, animal nia luan inklui uma toos no baraka sei la hetan material rekuperasaun, tanba material rekuperasaun iha ba deit uma hela fatin loloons neebe afeta dezastre naturais.
“Se sira merese simu, tenke simu lalika ida 100 ida mos ita rekupera 200 mos ita rekupera, neebe labele duvidas. Husu ba hau nia inan aman sira ita la halo diskriminasaun ba se se deit, uma hela fatin neebe hetan estragus, ami iha dever motal atu rekupera,” Joaquim komenta.
Iha fatin hanesan vitima insendiu Ueru-Mata, atual Xefe Suku Ueru-Mata Sabino Martins sente triste ho politika verifikasaun husi APC, tanba nia uma hela fatin hetan insendiu hamutuk ho uma rua seluk iha tinan 2025, maibe uma rua refere naran tama iha lista material rekuperasaun 2026 enkuantu uma neebe pertense ba Xefe Suku Ueru-Mata elimina husi lista.
“Ohin ami xefe ekipa rekuperasaun sira halo ona reklamasaun, se la konsidera hau esplika ba hau, maibe semana rua hanesan nee sira sei ba hau nia fatin atu re-verifika fali hau nia uma, nee hau satisfas,” Sabino komenta.
Lista material rekuperasaun 2026 hamutuk 185 Sabino konsidera APC halo diskriminasaun no halo manipulasaun, maibe nee liu ona, tanba vitima insendiu Sabino Martins asina ona karta reklamasaun ho Xefe ekipa re-verifikasaun husi APC tuir planu sei halo levantamentu ikus iha tempu besik hodi submete ba lista material rekuperasaun faze daruak tinan 2026.
(tom)
