DILI, STLTIMORLESTE.com – Tribunal Judisiál Primeira Instánsia Dili (TJPID), iha Tersa-feira (29/09), hala’o julgamentu ba kazu krime obstrusaun ba autoridade públika ne’ebé involve arguidu inisiál LM, ne’ebé akuzadu tanba alegadamente baku membru polísia ida.
Ministériu Públiku akuzadu katak, iha loron 13 Abril 2026, tuku 10:00 dadeer, iha Komandu Munisípiu Dili, lezada AdJ, membru Polísia, servisu hela iha nia gabinete.
Tuir akuzasaun, Polísia hosi Eskadra Komoro lori arguidu LM mai Komandu Munisípiu Dili, iha diresaun VPU, kona-ba investigasaun kazu abuzu seksuál ba menor.
Depois arguidu to’o iha Komandu, lezada informa no haruka arguidu tuur iha sala investigasaun.
Tuir Ministériu Públiku, bainhira arguidu sai hosi sintina, nia oan sira haree sira-nia aman no tauk. Oan sira hakuak lezada tanba tauk sira-nia aman.
Akuzasaun hateten katak, bainhira arguidu hakarak atu tuku nia oan sira, lezada satan netik nia hahalok. Iha momentu ne’e, arguidu allegedamente uza liman tuku lezada dala rua iha ulun parte karuk, no uza ain tebe lezada dala rua iha kelen, halo lezada monu ba rai.
Akuzasaun mós hateten katak, arguidu kontinua estraga sasán sira iha edifísiu laran, inklui komputadór no sasán seluk.
Ministériu Públiku konsidera arguidu LM nu’udar autor materiál ba krime obstrusaun ba autoridade públika, tuir Artigu 243 númeru 1 hosi Kódigu Penál.
Maibé, iha julgamentu, arguidu LM la simu hotu faktu sira ne’ebé Ministériu Públiku akuzadu ba nia.
Arguidu deklara katak, balun hosi faktu sira loos, maibé balun sala. Nia nega tuku lezada dala rua, no hateten katak nia tuku lezada dala ida de’it iha parte rentos karuk.
Arguidu mós nega tebe lezada dala rua. Nia deklara katak, bainhira akontese konflitu, membru Polísia sira uza gás lacrimogéneu ba nia matan.
Tuir deklarasaun arguidu, bainhira lezada atu halo investigasaun ba nia, lezada uluk dehan liafuan ne’ebé halo nia nervozu, no tanba ne’e nia tuku lezada. Nia nega katak nia tuku tanba problema kona-ba nia oan sira.
Arguidu mós deklara katak, membru Polísia sira barak baku nia, to’o nia oin hetan kanek no ran. Hafoin nia evakua ba Ospitál Nasionál Guido Valadares (HNGV) atu simu tratamentu.
Arguidu hateten tan katak, nia oan sira tauk no halai ba Polísia tanba, tuir nia, iha uma laran nia halo buat arbiru.
Depois rona deklarasaun arguidu, Tribunal marka kontinuidade julgamentu ba loron 12 Outubru 2026, tuku 10:00, atu rona deklarasaun lezada no testemuña sira.
Tribunal marka data foun tanba lezada no testemuña sira, maski hetan notifikasaun, la marka prezensa iha audiénsia no la fó justifikasaun.
Julgamentu ne’e prezide hosi kolektivu juízes José Escurial no Fransisca Cabral, ho Ministériu Públiku reprezenta hosi Prokurador Luís Hernani Rangel. Arguidu hetan asisténsia jurídika hosi Defensora Públika.
(ter)
