BAUKAU, STLTIMORLESTE.com – Asidente entre karreta Hilux kor mean ho Bis Diresaun Baukau ba Dili neebe akontese iha area Kairavela, Postu Administrativu Vemasi, Munisipiu Baukau, hodi rezulta mate no kanek grave, impaktu husi kundotor dukur.
Komadante Komando Polsia Munisipiu Baukau, Superintendente Xefe Polisia, Antonio Maria De Sa esplika, asidente nee akontese iha loron 18 Dezembru 2024 parte loraik, iha neebe ema nain 3 inklui kundotor hamutuk nain 4 ho karreta Hilux husi Baukau atu ba Dili no karreta bis husi Dili ba Baukau, maibe too iha dalan klaran estrada publiku area Kairavela Vemasi hasoru asidente, tanba kundotor falta kontrolu.
“Nia motivu mak ida lori karreta Hilux nee halai ho velosidade, depois kauza tanba nia matan dukur okupa dalan klaran entaun mosu asidente,” hatete Superintendente Xefe Polisia, Antonio iha Vila Nova, Sesta (20/12/2024).
Nia dehan, hafoin asidente nee akontese parte Polisia Tranzitu Baukau inklui parte Ambulansia too kedas fatin akontesimentu, iha neebe vitima nain 4 husi karreta Hilux hetan pankada makaas, nunee kundotor ho naran Nataniel Inocensio Baquita Lemos idade 25 mate fatin no nain 3 hanesan Proferio Francisco Soares, Orleans Angel Francisco Lay no Norlan Nelson Francisco kanek grave.
Nunee parte Ambulansia too kedas fatin hodi evakua vitima nain 3 ho emerjensia atu halo tratamentu iha Hospital Rejional Eduardo Ximenes (HoREX) Baukau, maibe nain 1 ho naran Proferio Francisco Soares mos hakotu iis no nain 2 hanesan Orleans Angel Francisco Lay no Norlan Nelson Francisco daudaun kontinua halo tratamentu.
Enkuantu vitima kundutor bis rasik ho naran Idelfonso Sebastião da Costa hetan tohar grave iha parte ain loos inklui pajaseiru sira mos hetan kanek neebe halo hela tratamentu iha HoREX Baukau.
Entretantu evidensia hanesan karreta Hilux sapa matrikula A.14-454 TLS no karreta bis sapa matrikula 38-076 TLS daudaun asegura hela iha fatin akontesimentu, tanba kondisaun grave atu evakua ba Komando Polisia Baukau.
(EST 2)
