DILI, STLTIMORLESTE.com – Visi Primeiru Ministru no Ministru Koordenador ba Asuntu Sosial, Mariano Assanami Sabino entrega ambulansia lima (5) ba Servisu Nasional Emejensia Ambulansia Mediku (SNAEM) atu koloka ba Munisipiu sira, maibe husu atu kuidadu ambulasia sira nee hodi uza ba tinan naruk.
Nia dehan, tinan ida nee governu hola ona ambulansia 5 hodi apoiu servisu ambulansia, tanba nee husu atu kuidadu sasan sira nee, nunee bele uza ba tinan naruk.
“Tinan 2024 ita hola ambulansia hodi apoiu saude, tanba ita hatene katak sistema saude nee importante tebes ba ita nia moris, tanba nee husu atu bele kuidadu ambulansia sira nee hodi ita bele uza ba tinan naruk,” dehan Assanami liu husi nia diskursu iha MS, Kaikoli Dili, Kuarta (04/12/2024).
Tuir Assanami tinan nee governu sosa ona ambulansia 5 no tinan oin 2025 sei hola tan 5. Tanba nee presiza sukat kapasidade hira mak sei presiza tan, hodi kompleta tan iha 2026.
Iha fatin hanesan, Diretór Jeral SNAEM, Simplicio Amaral de Deus hatete, Governu tinan ida nee preve ona orsamentu ba SNAEM hamutuk US$ 2.400.103,928 atu sosa tan ambulansia 5 hodi apoiu ba Munisipiu sira.
Tanba ambulansia iha 13 Munisipiu inklui RAEOA balu kondisaun la diak, nunee presiza aumenta tan ambulansia hodi bele apoiu saude iha Munisipiu. Liu husi ambulansia 5 nee bele ajuda ona SMNAEM hodi halo servisu diak liu tan hodi servi povu ida ho diak.
(jen)
