BAUKAU, STLTIMORLESTE.com – Labarik mane nain rua (2) iha Suku Gariuia, Postu Administrativu Baukau Vila, Munisipiu Baukau, hetan tata husi animal asu neebe pozitivu ba virus raiva.
Xefe Suku Gariuai, Arlindo Belo Freitas aprezenta insidente refere akontese iha loron 07 Abril, pur-volta tuku 11:00 parte meudia, animal asu ida tata labarik mane nain rua, nain idade idade 09 no nain ida idade 16, neebe komunidade sira transporta kedas vitima nain rua nee ba Hospital Rejional Eduardo Ximenes (HoREX) hodi hetan tratamentu saude nomos informa ba parte kompetente hanesan Veterinaria Munisipal hamutuk ho pesoal saude animal too kedas fatin akontesimentu hodi foti amostra no halo teste ba animal asu refere.
“Rezultadu teste nee, veterinaria informa ba ami dehan asu nee pozitivu raiva,” hateten Xefe Suku Gariuai, Arlindo Belo Freitas ba jornalista sira iha Vila Nova Baukau, Kinta (09/04/2026).
Nia sublina, hafoin rezultadu hatudu animal asu refere pozitivu raiva, parte veterinaria halo kedas prevensaun liu husi aviza ba komunidade sira iha Suku Gariuia atu atensaun ba asu no husu hadook aan husi animal asu, tanba parte veterinaria seidauk sosializa kona-ba virus raiva neebe hadaet husi animal asu ba ema.
Nia fundamenta, kondisaun sidadaun vitima nain rua refere iha HoREX Baukau parte mediku sira atende liu husi vasina neebe daudaun alta ona, maibe kontinua iha faze kontrola ba rekuperasaun.
“Informasaun dehan sidadaun nain rua mate nee lae, maibe asu mak mate, tanba komunidade mak oho,” Arlindo Freitas akresenta.
Liga asuntu nee tenta konfirma responsavel Veterinaria Munisipiu Baukau, maibe lakohi fo komentariu, tanba sei hatoo relatoriu ba nasional no diriji ba Autoridade Munisipal hafoin informa ba publiku.
(tom)
