DÍLI, STLTIMORLESTE.com – FEDA husu orsamentu adisionál US$ 15 millaun ba Orsamentu Jerál Estadu (OJE) 2027 atu kontinua no kompleta projetu estrada no infraestrutura iha Ataúru.
Diretór Adjuntu Fundu Espesial Dezenvolvimentu Ataúru (FEDA), Adao Soares hato’o pedidu ne’e tanba alokasaun orsamentu ne’ebé simu menus kompara ho nesesidade projetu sira.
Nia esplika katak, iha 2026, FEDA hetan orsamentu US$2,9 millaun atu implementa projetu estrada iha troçu tolu.
Adao Soares hateten katak, prosesu pagamentu ba projetu sira ne’e konsege finaliza ona, maibé projetu seluk presiza kontinuidade finansiamentu atu remata.
“Bazeia ba planu anuál, ita presiza US$19 millaun, maibé depois simu rezultadu tetu, FEDA hetan de’it US$900.000,” nia dehan ba jornálista sira iha Parlamentu Nasionál, Kinta (22/10/2026).
Nia afirma katak, limitasaun orsamentu ne’e kria difikuldade ba FEDA atu implementa projetu infraestrutura tuir planu anuál ne’ebé estabelese ona.
Tanba ne’e, FEDA husu Komisaun E Parlamentu Nasionál atu konsidera posibilidade aumenta orsamentu ba kapitál dezenvolvimentu iha 2027.
Adao Soares hateten katak, konstrusaun estrada iha Ataúru hatudu ona progresu, ho ligasaun husi kapitál ba suku lima no kontinua to’o aldeia sira.
Nia afirma katak, estrada sira ne’e fasilita komunidade asesu ba eskola, servisu saúde no atividade komersiál, inklui transporte produtu ba merkadu.
“Uluk aldeia balun la asesu ba ambulánsia, maibé ohin povu kontente tanba ambulánsia bele to’o iha bairru,” nia dehan.
Tuir Adão Soares, dezenvolvimentu estrada importante atu hadi’a konektividade no fasilita asesu ba servisu báziku iha territóriu Ataúru.
Nia informa katak, troçu estrada rua besik kompleta 100%, enkuantu troçu haat seluk atinji ona progresu 50%.
Alvu konstrusaun estrada iha Ataúru hamutuk 55 kilómetru, no pagamentu ba servisu iha 13 kilómetru atinji ona 100%.
Iha setór eletrisidade, Mateus Belo hateten katak aldeia tolu de’it mak seidauk hetan asesu, no FEDA sei buka dalan atu kompleta infraestrutura ne’e iha tinan oin.
Nia mós relata katak ezekusaun orsamentu FEDA ba tinan 2026 atinji ona 89%.
Komisaun E Husu Justifikasaun Orsamentu
Prezidente Komisaun E Parlamentu, Marcos Xavier hato’o preokupasaun kona-ba limitasaun orsamentu FEDA no impaktu ba implementasaun projetu infraestrutura iha Ataúru.
Nia husu klarifikasaun kona-ba diferensa entre nesesidade orsamentu no alokasaun ne’ebé FEDA simu ba tinan 2027.
“Ami husu kona-ba planu inisiál ba orsamentu 2027 no tanba saida mak iha mudansa. Sira esplika katak tetu ne’ebé sira presiza besik US$19 millaun,” Marcos Xavier dehan.
Nia subliña katak, desizaun atu aumenta orsamentu tenke konsidera kapasidade ezekusaun no rezultadu implementasaun projetu sira.
“Se imi nia ezekusaun ki’ik, ita la bele aumenta tan osan. Ita tenke asegura katak ezekusaun bele lao di’ak,” nia afirma.
Marcos Xavier hateten katak, Komisaun E sei analiza posibilidade aumenta alokasaun ba Ataúru, liuliu iha kapitál dezenvolvimentu.
Nia enfatiza katak, planeamentu orsamentu tenke bazeia ba nesesidade infraestrutura, progresu obra no kapasidade atu ezekuta osan públiku ho responsabilidade.
(alb)
