DILI, STLTIMORLESTE.com – Atu kompete iha kampu trabalhu, haree ba iha kursu neebe mak loke husi Instituisaun Ensinu Superior, hodi bele atende nesesidade ba graduadus neebe remata ona sira nia estudu.
Informa Reitor Instituto Superior Cristal (ISC), Sebastião Pereira ba STL iha nia knaar fatin, Kuarta (29/04/2026).
“Buat sira hanesan kursu neebe mak loke nee, haree kursu neebe mak iha, ita haree mos ita nian kampu servisu ninia, servisu iha mak ita bele atende nesesidade, liu-liu sira neebe mak gradua nee ou remata ona sira nian estudu iha ensinu superior. Ezemplu ami iha Cristal, Fakuldade rua anterior, agora foin loke tan Fakuldade Agrikultura,” dehan Reitor Instituto Superior Cristal (ISC), Sebastião Pereira.
Nia hatutan, Fakuldade Edukasaun sira nee barak liu mak remata nee, servisu nuudar sai profesor, hanesan ba hanorin iha Ensinu Infantil, Ensinu Baziku, Ensinu Sekundariu no Ensinu Tekniku Vokasional, nee ba area edukasaun ninia, mestradu mos hanorin iha universidade ba area edukasaun, iha kooperasaun ho universidade sira seluk hodi bele uza ema sira nee ba hanorin iha area remotas sira.
“Nee hanesan ba iha Fakuldade Edukasaun, Fakuldade Saude nee iha Departamentu Enfarmajen, Parteira, haree politika Ministeriu Saude iha suku sira presiza enfermeiru, parteira, no mediku sira hodi atende ida nee, hau hanoin ida nee bele uza hirak neebe remata estudu iha area saude ninia,” nia dehan.
Nunee mos Reitor East Timor Coffee Institute ( ETCI), Mateus Maia de Jesus hatete, kada tinan universidade iha TL produs ona graduadus neebe remata sira nia estudu, maibe oinsa mak graduadus sira bele kria servisu ba sira nian aan rasik.
“Ita produs Rekursu Umanu laos bazeia ba kampu trabalhu neebe mak ita iha, tanba kampu trabalhu nee hanesan buat ketak ida, maibe produs rekursu umanu nee sai baze importante ba ema ida-idak, agora depende ba ema ida-idak oinsa mak atu kria servisu, laos ita produs ema atu ba buka servisu deit, maibe ita produs ema oinsa kria servisu ba ninia aan rasik,” nia komenta.
Iha fatin seluk, Diretor Ezekutivu TLCE, Jose Monteiro dehan, los duni too agora graduadus barak mak seidauk hetan servisu no balun ba servisu iha rai liur, tanba iha rai laran nee menus kampu servisu, tanba ho kampu servisu neebe mak menus halo graduadus barak sai ba servisu iha rai liur.
“Los duni too agora ita nian graduadus barak mak seidauk hetan servisu no balun ba servisu iha rai liur, tanba iha rai laran nee menus kampu servisu, tanba ho kampu servisu neebe mak menus, halo graduadus barak sai ba servisu iha rai liur,” nia afirma.
(jac)
