DILI, STLTIMORLESTE.com – Tuir pasiente Gilda Guterres husi Munisipiu Baukau katak, atendimentu iha sala Emerjensia Hospital Nasional Guido Valadares (HNGV) lao normal, tanba pasiente ladun iha.
“Ita haree pasiente neebe halo tratamentu iha sala Emerjensia lao normal, tanba pasiente ladun iha,” hatete Pasiente Gilda Guterres ba jornalista sira Iha sala Emerjensia HNGV, loron kinta feira (07/05/2026).
Nia dehan, pasiente neebe moras grave nomos pasiente neebe hetan asidente, pasiente neebe evakua husi hospitál referal mai HNGV.
“Ita haree ema moras baibain la mai ona halo tratamentu iha HNGV, so moras neebe mai nee grave hanesan ema tensaun aas, struk ona, asidente hanesan lima tohan ain tohar, nomos ita haree pasiente neebe rujuk husi hospitál referal sira, hau rasik hetan moras neebe presiza duni konsulta iha HNGV,” nia esplika.
Iha fatin hanezan, Xefe Departementu Emerjénsia HNGV, Julia Rodrigues Quintão informa, pasiente mai konsulta sala Emerjensia HNGV nee pasiente neebe presiza duni atendimentu ho emerjensia duni, maibe pasiente neebe mai konsulta hanesan moras baibain nee bele konsulta iha Sentru Saúde no Postu Saúde sira neebe besik sira nia hela fatin.
“Ita nia atendimentu lao diak tebes, no daudaun nee ita nian komunidade mos hatene ona katak, moras hanesan isin manas, ulun moras, inus metin nee bele halo tratamentu iha Sentru Saúde no Postu Saúde, maibe mos ita haree pasiente neebe tenke halo tratamentu duni iha HNGV ita nia mediku sira sempre fo atendimentu neebe diak,” afirma.
(jen)
