DILI, STLTIMORLESTE.com – Estrada husi diresaun Letefoho bá Atsabe neebe daudaun nee sei nafatin ho kondisaun aat, halo Atsabe oan sira laran susar no triste bainhira halo movimentu sempre iha sofrimentu nia leten.
Tuir Komunidade Atsabe, Maria Soares Gomes katak, kondisaun estrada husi Díli bá Gleno diak, maibe husi Gleno bá Letefoho no too bá Atsabe halo povu kiik sira laran susar, i pior liutan husi Letefoho atu bá Atsabe halo kondutor no bis ka kareta nain mós tauk atu halai. Tanba kondisaun dalan aat nee mak dadaun nee bis nain sira hasae osan kareta husi Dila bá Atsabe neebe antes nee US$ 7 agora sae bá US$ 15 kada ema ida. Bainhira dalan diak mak sira normaliza fali folin bá pasajeiru sira hanesan antes nee.
Nia dehan, haree bá situasaun neemak halo komunidade balun labele lao bá mai Díli no Atsabe, tanba selu bis karun no dalan neebe aat halo ema trauma. Familia balun husi Atsabe mai hela deit iha Dili. Tanba bis ladun halai, kondutor tauk ho dalan neebe aat nee, no bis neebe nafatin halao hodi tula pasajeiru hasae folin. Situasaun neemak halo maluk balun Mai Dili too agora seidauk fila bá Atsabe no balun husi Dili bá Atsabe seidauk fila.
“Hau mos atu bá Atsabe, ajuda Pai ho Mae iha uma Atsabe maibe dalan ho osan selu bis karun neemak halo hau laran hodi halimar hela iha Díli, iha maun nia uma hodi hein ema hadia tiha dalan mak bá,” dehan nia STL iha Komoro, Kuarta (03/06/2026).
Nia afirma, familia balun mai halimar iha Díli besik tiha fulan, tanba deit dalan aat no osan selu bis mós karun. Neemak sira balun liu deit husi Maliana, Kailako nian hodi tama fali bá Atsabe hodi haree fali tos ho animal sira iha neeba.
Nia hatutan, husu bá governu atu tau matan bá dalan estrada neebe aat, tanba povu kiik presiza dalan neebe diak hodi lori sira nia produtu lokal mai faan iha merkadu, no lori hahan mai haree sira nia oan neebe eskola Dili. Sekuandu governu nonok no husik hela deit nunee, halo povu kiik sira moris nafatin iha terus ho susar nia laran.
Nunee mós Eldino Soares katak, estrada Munisípiu Ermera husi Gleno bá Atsabe transporte tenke ultrapasa husi fatin nee, halo populasaun obriga aan tenki asume risku hotu-hotu neebe ameasa ba sira nia vida, tanba deit rendimentu família labele lakon. Bainhira patraun no kondutor desidi hapara movimentasaun transporte família balu neebe oan hasoru situasaun difísil tenki obrigatoriu aman ka maun tenki lao ain husi Atsabe tama Letefoho no Gleno foin ho transporte kontinua ba Díli hodi rezolve preokupasaun oan-sira-nia.
“Hau nudar estudante senti triste no laran susar haree bá dalan Munísipiu Ermera nian, liu-liu Diresaun husi Gleno too Atsabe, mais aat liu mak husi Letefoho tama too Atsabe halo ita trauma tanba tauk kareta atu baku fila, monu bá rai naruk no mout bá tahu neebe dodok. Se bele nai ulun sira rejolve lalais tiha dalan neeba, atu nunee ami nia inan aman agrikultor sira bele lori sira nia sasan mai faan iha merkadu kapital nian, sekuandu husik hela deit hanesan nee, sira atu hetan osan husi neebe,” dehan nia.
Nia katak, mai eskola iha Díli presiza osan no hahan ruma, sekuandu dalan aat hela deit hanesan nee inan aman sira atu mai haree oan sira hanusa. Neebe husu bá nai ulun sira atu tau atensaun bá kondisaun estrada sira iha rai laran.
Entertantu tuir observasaun diariu nee iha terminal Tasitolu, dader tuku 3:00 otl, pasajeiru sira neebe atu halo viazem ba Atsabe tenke hein ona bis hodi hadau fatin tur iha bis neebe Nia hetan bá, bá sira neebe la hetan fatin tenke adia fali bá loron tuir mai. Bis neebe tula pasajeiru ladun barak tanba deit kondisaun estrada.
(dom)
