DILI, STLTIMORLESTE.com – Jurista Timor oan konsidera katak, tempu ona prepara Juiz Timor oan atu sai inspetor ba servisu Tribunal nian, maibe Juiz ida neebe atu sai Inspetor tenke foti husi Juiz dezembargador sira.
“Atu sai inspetor iha ita nia rain nee ita hakarak kleur ona, maibe ita nia kualidade Juiz nee seidauk too iha neeba, tanba ema atu sai inspetor nee ema tenke Juiz dezembargador,” dehan Jurista Alexandre Corte Real ba STL iha Kaikoli, Segunda (10/08/2026).
Nia hatutan, ba futuru ho rekrutamentu neebe lao hela se iha ona Juiz dezembragador barak sira mos bele nomeia sai Juiz dezembargador, tanba tempu too ona.
Iha sorin seluk, Jurista Sergio Dias Quintas dehan, tempu too ona Timor oan bele sai inspetor.
“Hau nia hanoin tempu too ona Timor oan mos bele sai hanesan inspetor ba servisu Tribunal nian, tanba durante dekade rua resin Timor Leste ukun rasik aan ita iha ona, Majistradu Judisiais kualifikadu neebe bele halo servisu hanesan inspetoria,” dehan nia.
Nia hatutan, tuir Estatutu Majistradu Judisiais, Juiz neebe bele sai inspetor mai husi Juizes primeira klase ho klasifikasaun minima bom.
Aktual Defensor nee afirma, nia hanoin neste momentu Juiz lubuk ida mak halao ona knaar hanesan Juiz primeira klase, sira hirak nee bele sai inspetor, maibe nee depende desizaun husi Konselhu Superior Majistradu Judisial (KSMJ).
Dehan tan, atu sai Sekretarius ba inspesaun no inspetores kontadores nee kabe ona kompetensia husi Konselhu Superior Mazistradu Judisial (KSMJ) tuir artigu 180 numeru 3 husi Lei N.5/2022, Estatutu Magistrados Judisiais.
Sergio profunda, tanba sa mak ita iha ona Juízes primeira klase, maibe la nomeia sira hanesan inspetor, no haruka nafatin Juizes internasionais sira hodi sai inspetor ho salariu boot, nee problema ida tenki haree no rezolve.
(ter)
