DILI, STLTIMORLESTE.com — Vise-Primeiru Ministru no Ministru Defeza Austrália, Richard Marles afirma katak, Governu Austrália kompromete atu hametin kooperasaun ho Timor-Leste hodi kombate krime transnasionál, liuhusi dezenvolve kapasidade Polísia no Força Defeza, partilla informasaun intelijénsia no hametin koordenasaun entre instituisaun seguransa sira.
Marles hato’o deklarasaun ne’e iha konferénsia imprensa iha podium Palásiu Prezidensiál, Bairro Pité, Dili, Kinta (22/10/2026), hafoin hala’o enkontru ho Prezidente Repúblika, José Ramos-Horta.
Nia esplika katak krime transnasionál sai dezafiu importante la’ós ba Timor-Leste de’it, maibé mós ba nasaun sira iha Sudeste Aziátiku no rejiaun Pasífiku.
Tanba ne’e, nia konsidera dezenvolvimentu kapasidade operasionál Polísia no Força Defeza nu’udar elementu importante atu enfrenta krime transnasionál ho efetivu.
“Ne’e presiza kapasidade reál, inklui ró no pesoál ne’ebé iha abilidade atu hala’o knaar ne’ebé presiza,” Marles afirma.
Nia hatutan katak, aleinde ekipamentu no rekursu umanu, partilla informasaun intelijénsia, koordenasaun no hametin relasaun servisu entre instituisaun polísia no defeza husi nasaun rua mós sai prioridade atu garante resposta ne’ebé koordenadu.
Marles rekoñese katak, krime transnasionál sai dezafiu ne’ebé kontinua aumenta iha rejiaun ne’ebé Austrália no Timor-Leste hela bá, nune’e presiza esforsu konjuntu atu enfrenta ameasa ne’e.
Nia subliña katak, Governu Austrália no Timor-Leste iha kompromisu boot atu servisu hamutuk hodi kombate krime transnasionál, liuhusi kooperasaun no hametin kapasidade instituisaun seguransa nian.
“Iha kompromisu boot husi Austrália no Timor-Leste atu trata krime transnasionál ne’e,” nia afirma.
Nune’e, kooperasaun entre nasaun rua ne’e sei sai importante atu hametin seguransa no responde ba ameasa krime transnasionál ne’ebé bele afeta Timor-Leste, Sudeste Aziátiku no rejiaun Pasífiku.
(jos)
