BAUKAU, STLTIMORLESTE.com – Desizaun Autoridade Munisipiu Baukau muda negosiante husi merkadu tuan ba merkadu foun Tuanau, negosiante nain 52 iha Vila Antiga koopera, tanba Ekipa konjunta neebe muda sira akompanha husi Polisia no Forsa Defeza Timor Leste.
Negosiante Vila Antiga, Jacinta Ximenes sente trsite ho desizaun refere, tanba laiha kondisaun neebe atu fasilita negosiante sira neebe muda uluk ona ba iha merkadu foun, maibe ekipa konjunta husi Autoridade Munisipal, iha loron 04 Dezembru nee, kontinua tan sobu negosiante sira nia baraka iha merkadu vila antiga.
“Autoridade Munisipiu nia hanoin iha karik kria tiha kondisaun mak muda ami, ami faan mak foin han hemu hodi ami nia oan sira eskola, maibe atu lori ami ba neeba fatin la too ba ami,” hatete Jacinta Ximenes ba jornalista sira iha Eis merkadu Vila Antiga, hafoin ekipa konjunta sira haloot hela sira nia sasan hodi muda ba merkadu Tuanau, Kuarta (04/12/2024).
Nia sublina, durante halo rejistu naran no dada sorte ba fatin negosiu nian iha merkadu, parte negosiante sira iha partisipasaun, maibe hafoin halo kolokasaun fatin ba negosiante sira husi merkadu vila antiga la hetan fatin.
Nunee ekipa Jestaun Merkadu liu husi kolaborasaun ho negosiante sira husi vila antiga, hodi koloka hikas ba fatin foun, maibe seidauk ateru tetuk hodi utiliza ba negosiu, tanba sei iha duut no fatuk laran, neebe laiha kondisaun atu faan sasan iha area kolokasaun.
Iha fatin hanesan, maluk negosiante Maria Soares mos preokupa ho kondisaun merkadu refere, tanba kondisaun hanesan eletrisidade, bee moos, estrada, fatin sanitasaun no seluk tan seidauk sufisiente ba negosiante sira atu utiliza, maibe desizaun Autoridade Munisipiu hatun ona orientasaun, prontu tenke koopera.
Hatan ba kestaun nee, Sekretariu Munisipal Planeamentu Investimentu No Dezenvolvimentu Integradu, Eduardo Filipe Ximenes hatete, tempu ona atu ekipa sobu negosiante sira nia sasan husi merkadu Vila Nova no Vila Antiga muda ba merkadu foun, tanba inisiu fulan Junhu 2024 aviza ona atu hamamuk fatin, maibe negosiante sira la koopera.
Kona-ba fatin iha merkadu foun sufisiente, tanba utiliza rai hamutuk hektare 8 ba negosiante sira iha Munisipiu Baukau, nunee negosiante neebe seidauk hetan fatin iha merkadu foun refere, bele hakbesik aan ba Ekipa Jestaun Merkadu hodi rejistu naran hafoin ekipa halo kolokasaun.
Maibe Parte Autoridade mos rekonhese kondisaun merkadu foun seidauk sufisiente, tanba sei iha preokupasaun balun, hanesan estrada, bee moos, eletrisidade, fatin sanitasaun, maibe sei esforsu hodi responde fazeadamente tuir orsamentu neebe Autoridade Munisipal iha.
(EST 2)
