BAUCAU, STLTIMORLESTE.com – Autoridade lokal husu Ministeriu Edukasaun (ME) tau atensaun ba projetu konstrusaun edifisiu eskola Ensinu Baziku Filial (EBF) Haulela Sarabala iha Suku Lelalai, Postu Administrativu Matebian, Munisipiu Baucau.
Xefe Suku Lelalai, Salamão Fraga Fernandes aprezenta, projetu konstrusaun edifisiu EBF Haulela Sarabala tuir kontratu projetu konstrusuan refere tinan ida, nunee loloos finaliza ona, maibe too ohin loron seidauk finaliza, tanba servisu atual semana tolu ona paradu.
“Konstrusuan atu lao nee susar oituan tanba husi parte badaen no komisaun la servisu hamutuk atensaun ba projetu ida nee. Parte ami nian kestiona tanba obra ida halo durante tinan tolu seidauk finaliza, maibe prespektika husi Edukasaun Munisipal no Nasional dehan diak hela deit,” hateten Salamão ba STL iha Vila Nova Baucau, Sesta (19/06/2026).
Nia esplika, projetu refere tipu projetu komunitariu iha neebe loloos servisu iha projetu refere husi sidadaun Postu Matebian nian oan sira, maibe kontratu fali badaen husi Oe-Cusse no ajuda husi minoridade mane nain rua no daudaun paradu, tanba badaen refere lisensa sei ba hela vizita familia iha Oe-Cusse.
Nia sublina, aliende projetu paradu, material konstrusuan sira hanesan sementi, batako no seluk tan balu hetan estragus ona, tanba nee husu troka badaen no Prezidente Komisaun ba projetu refere nunee bele aselera servisu refere finaliza iha tempu badak, tanba Prezidente Kominaun ba projetu refere atual pasa feira iha Oe-Cusse.
“Tenke halo mudansa ona, liu liu Prezidente Komisaun Konstrusuan, tanba pensaun tiha ona la ativu tiha ona entaun troka ona para garante konstrusaun nee,” Salamão rekomenda
Liga asuntu nee, STL tenta konfirma Diretor Servisu Munisipal Edukasaun Baucau, maibe laiha fatin atu fo komentariu.
Entretantu projetu konstrusaun edifisiu ba EBF Haulela Sarabata nuudar projetu komunitariu husi PKRIE tinan 2023 faze daruak neebe implementa iha Munisipiu Baucau hamutuk 11, tuir dadus neebe STL iha projetu 10 finaliza ona enkuantu EBF Haulela Sarabala neebe konstrui ho valor orsamentu US$ 129.680,90 responde ba sala 3, neebe konstrui iha tinan 2023 too ohin loron progresu fiziku foin atinji 23% no foin iha faze pagamentu dahuluk 25% nian.
(tom)
