DILI, STLTIMORLESTE.com – Xefe Suku Laline, Postu Administrativu Lakluta, Munisipiu Vikeke, Jaquel dos Reis de Carvalho preokupa ho presu foos 25 kilograma neebe faan iha merkadu ho folin US$ 25.
“Hau hanesan Xefe Suku preokupa los, tanba povu agora nee hasoru problema boot kona-ba foos, ita bele koalia foos 20 kilo presu US$ 20 foos 25 kilo nia presu US$ 25, tanba komunidade uza sira nia kuda ba sosa hafoin mai faan tutan, nunee presu karun, pasiensia komunidade sira tenke sosa, tanba udan karreta halo movimentu la diak,” hatete Jaquel ba STL iha Munisipiu Vikeke, Kuarta (29/01/2025).
Nia hatutan, komunidade rasik lori ho sira nia kuda hakur mota ba sosa foos iha Kribas ou Postu lori mai faan tutan mak presu foos karun, tanba distansia dook, iha tempu udan kondisaun estrada aat nunee transporte la halo movimentu, nunee susar lori sasan faan iha Suku, tanba dalan la diak nomos ponte laiha.
Kuandu tempu udan presu foos sempre karun, tanba nee komunidade pasiensia sosa deit produtu nebee sira faan iha merkadu hodi sosa foos nee, kuandu la sosa han saida, se la sosa foos han aifarina no feuk.
“Relasiona ho presu foos karun iha Suku Laline, nuudar Autoridade lamenta tebes, tanba presu foos iha Postu la hanesan iha Suku nomos Munisipiu, ida nee sente ladun kontente tanba komunidade sira nee iha neeba laos maioria funsionariu, maibe agrikultor,” dehan nia.
Nuudar Autoridade Lokal husu ba Governu liu husi Ministeriu Obras Publiku (MOP) hadia estarda iha suku, tanba dala barak halo proposta hatoo ba nasional maibe rezultadu la iha too ohin, maibe Autoridade Lokal husu nafatin para MOP haree ba estrada ponte neebe tinan barak povu haleriik, oinsa hadia para fasilita komunidade sira halo movimentu ba mai atu presu sasan tun, se la hadia dalan no ponte nee komunidade sai vitima nafatin ba dezenvolvimentu.
Total populasaun iha Suku Laline hamutuk 1.970, uma kain 534 kompostu husi Aldeia 5 mak hanesan Aumenta Hun, Fatu Kado, Mau Ama, Mikare ho Santo Antonio.
Iha parte seluk, Xefe Aldeia Mikale, Ornai de Carvalho hatutan, relasiona ho presu foos karun iha Laline, povu iha kbiit sosa, laiha kbiit la sosa, tanba foos 25 kilo presu US$ 22, foos 25 kilo presu US$ 25, tanba komunidade ho kuda ba sosa nunee faan tutan, tanba udan no kondisaun estrada la diak, nunee afeta ba iha presu foos.
(joa)