QUELICAI ANTIGU, STLTIMORLESTE.com – Autoridade Postu Administrativu Quelicai Antigu husu Institutu Gestaun Ekipamentus (IGE) loke matan ba estreda diresaun husi area Samaguia, Suku Tequinomata, Postu Administrativu Laga ba Suku Afaça, Postu Administrativu Quelicai Antigu, Munisipiu Baucau, atualidade kondisaun aat no grave.
Administrador Postu Quelicai Antigu, Fransisco Matias Gusmão “Junior” aprezenta, diresaun estrada husi area Samaguia, Suku Tequinomata, Postu Administrativu Laga too iha Suku Afaça, Postu Administrativu Quelicai Antigu neebe atualidade kondisaun aat hamutuk Kilometru (Km) 6 resin, iha neebe tempu udan difikulta movimentasaun transporte publiku no privadu, tanba rai kois.
Nia sublina, kondisaun estrada refere kuaze aat tinan naruk ona difikulta komunidade sira nia movimentu, tanba nee hafoin simu dezisaun husi Governu Sentral nomeia nuudar Administrador Postu Quelicai Antigu, iha tinan 2025 diriji pedidu ba IGE liu husi Autoridade Munisipal Baucau, atu IGE ateru estrada refere, maibe too ohin loron seidauk implementa, tanba razaun IGE menus ekipamentus.
“IGE responde katak ekipamentus nee mak la sufisiente hodi halo intervensaun ba ida nee, mais ita kontinua husu para IGE labele taka matan, tanba sidadaun iha Quelicai Antigu nuudar povu iha Timor,” hateten Administrador Postu Quelicai Antigu, Fransisco Matias Gusmão “Junior” ba STL iha nia knaar fatin Suku Afaça, Kuarta (03/06/2026).
Too notisia nee publika STL seidauk hetan komfirmasaun husi parte Institutu Gestaun Ekipamentus.
Entretantu estrada diresaun husi area Samaguia ba Suku Afaça fo asesu ba komunidade husi Suku haat, mak hanesan Guruça, Afaça, Namanei sorin inklui Uaitame sorin.
(tom)
