DILI, STLTIMORLESTE.com – Tribunal Judisial Primeira Instansia Dili halao julgamentu ba arguidu ho inisial MO, tanba halo agresaun hasoru lezadu hanesan oan ho inisial TA.
Tuir akuzasaun neebe Juiz Prosesu Ersilia de Jesus lee sai iha loron Segunda nee katak, iha loron 3 fulan Agostu tinan 2023, iha tuku 4 loraik, arguidu lori ain tebe lezadu nia kanuruk ho makaas.
Arguidu tebes tiha lezadu, halo lezadu monu ba rai too dada iis la diak.
Konsekuensia husi arguidu nia hahalok nee, halo lezadu sente moras hodi ba halo tratamentu iha Pradet.
Tanba nee, MP akuza arguidu komete krimi Violensia Domestika ho Forma Ofensa Integridade Fizika Simples neebe previstu iha artigu 145 husi Kodigu Penal.
Arguidu deklara katak, faktus neebe iha lalos, tanba momentu neeba arguidu ba faan sasan foin fila mai uma, arguidu nia liman kaer hela sasan sira tau iha arguidu nia kabas nee.
No lezadu hamriik iha dalan sata netik arguidu atu lori sasan tama ba uma laran, mak arguidu mos hit sasan todan hela iha kabas, lori ain dudu ses lezadu hodi tama ba uma laran.
Arguidu nega la tebe lezadu hodi monu ba rai, maibe dudu ses deit lezadu. Arguidu deklara, momentu neeba antes akontese ida nee, arguidu mos iha problema ho nia feen, tanba nee arguidu deskonfia nia feen mak nervozu ba arguidu hodi ba hatoo keixa, dehan arguidu baku sira nia ona.
Lezadu deklara katak, durante nee lezadu ho nia aman diak malu hela, tanba nee kona-ba saida mak akontese ona, lezadu la lembra tanba kleur ona.
Rona tiha deklarasaun sira nee, iha alegasaun Prokurador Napoliao da Silva husu Tribunal tetu tuir konvikasaun tuir Tribunal nia hanoin. No Defeza husu Tribunal atu aplika pena admoestasaun.
Rona tiha alegasaun, Tribunal adia ba loron seluk hodi rona desizaun.
Audensia Julgamentu nee prezide husi Juiz Singular Ersilia de Jesus, MP reprezenta husi Prokurador Napoliao da Silva, arguidu hetan asistensia legal husi Defensor Publiku nain ida.
(ter)
