DILI, STLTIMORLESTE.com – Ministeriu Publiku iha nia alegasaun ba krimi Ofensa Integridade Fizika Simples, husu ba iha Tribunal atu absolve arguidu ho inisial JRN hanesan lezada ENF nia alin mane, no kondena arguidu ho inisial JFF hanesan lezada nia aman.
Iha alegasaun nee, Prokurador deklara katak, faktus neebe konsta iha akuzasaun provadu katak, arguidu nain 2 halo duni krimi hasoru lezada.
Maibe ba iha arguidu ho inisial JRN, Prokurador husu Tribunal atu homologa krimi neebe dun ba arguidu, tanba krimi Ofensa Integridade Fizika Simples natureza semi publiku, lezada aseita atu dada fila krime nee.
Ba iha arguidu JFF Prokurador mantein ho krime Violensia Domestika ho forma Ofensa Integridade Fizika Simples, husu Tribunal atu kondena arguidu ho pena multa.
Enkuantu husi parte defeza nian husu Tribunal atu homologa arguidu ho inisial JRN, no husu Tribunal atu aplika justisa neebe justu ba arguidu ho inisial JFF.
Rona tiha alegasaun, Tribunal adia hikas ba loron seluk hodi rona desizaun.
Tuir akuzasaun neebe iha katak, lezada iha relasaun ho arguidu nain rua, hanesan aman no alin mane.
Iha loron 01 fulan Maio tinan 2022 iha Akadiruhun momentu neeba arguidu JRN, ho nervozu dudu makas lezada, maibe halo lezada monu tun kedas ba rai kauza lezada hetan kanek iha liman, no moras iha kidan.
Banhira dudu tiha lezada monu ba rai, arguidu JFF hanesan lezada nia aman, uza liman basa ho makaas dala ida kona-ba iha lezada nia hasan, hodi rezulta moras.
Kauza husi problema nee, arguidu no lezada sira diskute malu kona-ba atu sosa pulsa eletrisidade halo dosi.
Konsekuensia husi arguidu nain rua nia hahalok nee, halo lezada sente la diak hodi hatoo keixa.
Tanba nee Ministeriu Publiku akuza arguidu nain rua hanesan ko-autor, ba krimi Ofensa Integridade Fizika Simples neebe previstu iha artigu 145 husi Kodigu penal.
Audensia julgamentu nee prezide husi Juiz Singular Zulmira Auxiliadora, MP reprezenta husi Prokurador Hernany Rangel, arguidu hetan asistensia legal husi Defensor Publiku Sarmento.
(ter)