DILI, STLTIMORLESTE.com – Lezada ka feen ho inisial CF han (hetan) tuku husi arguidu ka laen ho inisial JBS, tanba bandu laen ba joga beliar.
Iha sala julgamentu laran loron Tersa (05/11/2024), Juiz prosesu Ivan Suritai lee sai akuzasaun katak, iha loron 21 fulan Maiu tinan 2023, iha Suku Madohi.
Iha momentu neeba arguidu sai husi sira nia uma atu ba joga beliar, maibe lezada la hatan arguidu ba joga beliar.
Ho nunee, arguidu nervozu koalia barak, no ameasa sei halo mate lezada, no mosu diskusaun makaas. Arguidu hamriik hodi dudu lezada, tuku dala ida kona iha lezada nia matan, tuku dala barak iha lezada nia kanuruk, hodi rezulta lezada monu ba rai, hodi liman baku ba rai no moras.
Konsekuensia husi arguidu nia hahalok nee, halo lezada sente moras hodi ba hatoo keixa.
Tanba nee, Ministeriu Publiku akuza arguidu komete krime Maus Tratus ba Konjunje neebe previstu iha artigu 154 no forma Violensia Domestika lei numeru 7/2010.
Hatan ba akuzasaun neebe iha, arguidu deklara katak faktus neebe iha loos hotu. Arguidu deklara momentu neeba arguidu halo duni agresaun ba lezada, tanba lezada koalia barak.
Arguidu mos rekonhese lori duni liman tuku ba iha lezada nia isin, no tuku iha lezada nia kanuruk halo lezada monu ba rai. Maibe depois akontesimentu arguidu buka dalan rezolve tuir familia, no agora daudaun sira diak malu ona. No arguidu mos arepende tebes nia aktu nee, promete sei la halo tan iha futuru.
Tanba arguidu konfesa imparsial, ho nunee Tribunal desidi hodi la rona lezada, no husu Prokurador no defeza atu tama kedan ba iha alegasaun.
Iha alegasaun nee, Prokurador Pedro Baptista mantein ho akuzasaun neebe iha, konsidera katak arguidu pratika duni krime refere hasoru lezada. Tanba nee Prokurador la iha duvidas, husu Tribunal atu kondena arguidu pena prizaun tinan rua, suspende ba tinan rua.
Enkuantu husi parte defeza Jose Maria Guterres husu Tribunal atu aplika pena neebe kmaan ba arguidu, tanba arguidu konfesa imparsial ba faktus.
Rona tiha alegasaun, Tribunal adia ba loron seluk 18 fulan nee hodi rona desizaun.
Audensia julgamentu nee, prezide husi Juiz Kolektivu, Arjentino Nunes, Zulmira Auxiladora, Ivan Suritai, Ministeriu Publiku reprezenta husi Prokurador Pedro Baptista, arguidu hetan asistensia legal husi Defensor Publiku Jose Maria Guterres.
(ter)
