DILI, STLTIMORLESTE.com — Emprezariu sira husi nasaun Tailandia iha interese atu apoia dezenvolvimentu Timor Leste (TL).
Delegasaun emprezariu altu nivel husi Tailandia hatoo interese durante enkontru ho Primeiru Ministru (PM), Kay Rala Xanana Gusmão iha Palasiu Governu, Sesta (30/05/2025).
“Hau foin simu delegasaun altu nivel ida, emprezariu sira husi Tailandia neebe mai atu haree oportunidade iha TL, oinsa bele investe ajuda dezenvolve ita nia rain. Ami troka hanoin diak tebes,” informa PM Xanana Gusmão hafoin simu Emprezariu Altu Nivel husi Thailandia iha Palasiu Governu.
PM dehan, Emprezariu hirak nee iha ona persesaun diak liu, kona ba realidade Timor, nunee sira sei mai beibeik hodi haree oinsa bele hahu investimentu atu ajuda dezenvolvimentu TL.
Iha biban nee, Xefe delegasaun Tailandia, Ashwani Bajaj haksolok Tebes no agradese tanba bele hasoru-malu ho PM, Kay Rala Xanana Gusmão.
“Ami foin primeirabes mai TL, ami haksolok tebes atu bele aprende liu tan, absorve no haree oportunidade saida deit mak iha, hodi ita servisu hamutuk. Ami hakarak fahe konhesimentu iha area turizmu, infraestrutura, kafe, plantasaun, ai fuan no seluk tan atu bele dezenvolve liu tán,” Ashwani Bajaj hateten.
Nia mos felisita TL neebe servisu makaas hodi ikus mai bele integra hanesan membru plena ba Association of Southeast Asian Nations (ASEAN) ba nasaun 11.
(jos)
