DILI, STLTIMORLESTE.com – Prezidente Republika (PR), Jose Ramos Horta la fo komentariu konaba deklarasaun husi Bankada CNRT, husu Primeiru Ministru Kay Rala Xanana Gusmão atu demite Ministru Agio Pereira.
Prezidente Republika Jose Ramos Horta ba jornalista sira, bainhira remata vizita estadu ba Vanuatu fila hikas mai Timor Leste iha Aeroportu Internasional Nicolau Lobato, Komoro, Segunda (03/08/2026) hatete, nia seidauk fo komentariu, se fo komentariu ruma bainhira rona ona hanoin ruma husi Primeiru Ministru Kay Rala Xanana Gusmão.
“Nee hau seidauk koalia ho Primeiru Ministru, entrega 100% kompetensia Primeiru Ministru nia, hau la tama iha assuntu neebe pertense ba Governu liu-liu ba partidu,” dehan Prezidente Republika Jose Ramos Horta.
Karik demite, ida nee sei fo impaktu ba iha Governu ka lae? hatan ba kestaun nee Prezidente Republika Jose Ramos Horta hatete, liga ho assuntu nee Prezidente la fo komentariu, ida nee kompetensia tomak iha Primeiru Ministru Kay Rala Xanana Gusmão nia liman.
“Hau la komenta, koalia tiha ho Primeiru Ministru mak hau bele komentar karik,” katak PR Horta.
Foin lalais Bankada Partidu Kongresu Nasional Rekonstrusaun Timor (CNRT) iha Parlamentu Nasional husu Primeiru Ministru Kay Rala Xanana Gusmão atu demite Ministru Prezidensia Konselhu Ministru (MPKM), Agio Pereira.
Xefe Bankada CNRT, Deputadu Patrocínio Fernandes hatete, rekomendasaun ida nee bazeia ba karta ida neebe iha tinan 2025 asina husi Deputadu CNRT nain 31 no estrutura partidu iha nivel nasional no munisípiu. Karta refere aprezenta ba Prezidente Partidu CNRT, Kay Rala Xanana Gusmão, no Sekretariu Jeral Partidu, Francisco Kalbuadi Lay, atu konsidera demisaun Agio Pereira husi kargu ministru.
Tuir Patrocínio Fernandes, motivu husi rekomendasaun nee mak tanba Agio Pereira publika artigu balun, neebe tuir sira nia haree bele dezakredita Governu no Estadu, no fo impaktu negativu ba estabilidade governativa.
Nia esplika katak, hanesan Ministru Prezidensia Konselhu Ministru, Agio Pereira tenke halo klarifikasaun no fo informasaun ofisial ba públiku bainhira mosu kestaun importante, laos publika kontiudu neebe bele afeta kredibilidade Governu.
Patrocínio Fernandes dehan, Bankada CNRT hanesan bankada neebe sustenta Governu, iha responsabilidade moral atu hatoo sira nia preokupasaun ba lideransa partidu. Nunee mos hanesan kuadru partidu, sira sente iha obrigasaun atu fo rekomendasaun ba Prezidenti no Sekretariu Jeral CNRT kona-ba situasaun nee.
(eme)
