DILI, STLTIMORLESTE.com – Bankada FRETILIN No PLP hatama pedidu ba iha Tribunal Rekursu (TR), hodi husu TR halo fiskalizasaun abstrata ba segunda alterasaun lei Organizasaun Judisiariu, neebe fo kompetensia ba Prezidente Republika hodi nomeia Prezidente Tribunal Rekursu, Afonso Carmona.
“Ohin Bankada FRETILIN no Bankada PLP aprezenta pedidu ida ba Tribunal Rekursu, kona-ba lei numeru 04/2025 neebe foin lalais Parlamentu aprova Prezidente Republika promulga,” dehan Deputadu Joaquim dos Santos ba jornalista sira iha Kaikoli, Kinta nee (08/05/2025).
Nia hatutan, iha artigu 76 alinha A neebe iha artigu nee fo kompetensia ba PR atu nomeia PTR foun, konsidera norma nee viola konstituisaun, tanba nee mak husu ba iha TR halao nia knaar hanesan Supremu Tribunal atu julga norma nee, tanba tuir sira nia hanoin viola konstituisaun, no espera Tribunal sei julga tuir sira nia pedidu. No husu Tribunal atu halo fiskalizasaun abstrata.
Iha fatin hanesan, Deputadu David Dias Ximenes dehan, sira ba iha TR hodi aprezenta fiskalizasaun abstrata.
“Ami mai aprezenta fiskalizasaun abstrata nee laos keixa, ida nee prosedimentu legal ida neebe ami aprezenta,” dehan David.
Nia hatutan, kuandu fiskalizasaun abstrata no fiskalizasaun preventiva nee husu ba iha Tribunal atu haree took iha inkonstitusionalidade ka lae.
Afirma, fiskalizasaun preventiva Prezidente Republika mak halo, hanesan Deputadu husu ba iha Tribunal atu haree kona-ba fiskalizasaun abstrata nee.
Aleinde nee Provedor Dos Direitus Humanus no Justisa (PDHJ), Virgilio da Silva Guterres dehan, haruka ona parte legal sira atu haree kona-ba lei neebe iha hodi nomeia PTR.
“Hau seidauk bele tama too iha neeba, tanba nee kompetensia orgaun soberanu iha PR iha kompetensia hodi nomeia, kona-ba nomeasaun nee tuir ka la tuir hau komunika ona ami nia parte legal nian atu haree katak, se nomeasaun nee kontrariu ho prinsipiu Konstituisaun nian, Provedor bele uza kompetensia tuir artigu 150 no artigu 15 atu husu fiskalizasaun abstrata ba Tribunal Rekursu neebe funsiona hanesan Supremu Tribunal Justisa,” dehan Provedor Virgilio.
Sublina, lei nee PR foin promulga no publika nomeasaun lao kedan, tanba nee parte legal nian sei haree hela, atu konfirma deit lei foun neebe sai baze ba Prezidente atu noemeia Juiz segunda klase ba pozisaun PTR.
Esplika, se nota mak iha violasaun ruma Provedor sei uza kompetensia tuir artigu 150 no artigu 151 atu husu fiskalizasaun abastrata ba TR.
(ter)
