DILI, STLTIMORLESTE.com – Bankada Partidu KHUNTO iha Parlamentu Nasional (PN) husu Governu atu normaliza presu kombustivel iha teritoriu Timor laran.
Deputadu Bankada KHUNTO, Luis Roberto hateten, molok nee Governu aprova dekretu lei numeru 13/2026 ho intensaun atu estabiliza presu kombustivel iha rai laran tanba krize mundial neebe akontese, tanba kauza husi funu iha mediu oriente.
Nia dehan, Governu presiza akompanha presu kombustivel mundial nian, se presu kombustivel tun ona mak Governu presiza altera lei neebe iha hodi normaliza Presu Kombustivel iha rai laran.
“Se kuandu haree ba presu mundial mak fila fali ba antes funu nee, hau fiar katak Governu tenki normaliza fila fali ita nia presu kombustivel iha Timor hanesan uluk, nunee labele fo impaktu ba ita nia sidadaun sira hanesan kada loron halo servisu hodi buka moris,” hatete nia ba STL iha Parlamentu Nasional, Kuarta (22/07/2026).
Nia mos husu Governu atu kontinua kontrola Sentru Abastasionamentu sira iha teritoriu laran, nunee labele faan presu kombustivel liu husi presu neebe antes nee determina liu husi dekretu lei neebe governu aprova ona.
Entretantu antes nee Ministru Petróleu Rekursu Mineral (MPRM), Francisco Monteiro hateten, oras nee Governu kontinua akompanha situasaun iha Mediu Oriente molok foti desizaun atu normaliza presu kombustivel iha rai laran.
“Kona-ba presu mina neebe sei sae, ida nee Governu, ami akompanha ho kuidadu tebes, ami la haluha ida nee, politika Governu nian sei kontinua mantein ho intervensaun sira neebe nesesariu liu husi dekretu lei ba estabeliza presu mina nian,” hatete nia ba jornalista sira iha Gabinete MPRM Falor, Dili, Sesta (17/07/2026).
Nia dehan, publiku kestiona tanba haree ba semana rua ka tolu liu ba presu mina mundial komesa tun, bainhira Prezidente Estadus Unidos Amerika Donalt Trump ho Iraun konkorda hodi asina akordu ida.
Antes nee mos Governu liu husi reuniaun Konselhu Ministru kria dekretu lei neebe estabeliza folin kumbustivel, diploma nee define limite masimu ba folin neebe ba kumsumidor hodi fiksa valor US$ 1.50 kada litru ba gazolina, ba gazoel kada litru US$ 1.65, kombustivel aviasaun nian kada litru US$ 50 no gas petrolifera likidu US$ 4.2 kada kilograma.
(alb)
