DILI, STLTIMORLESTE.com – Batik Air no Garmin halo parseria ho Maratona Internasional Dili (MID) 2026 neebe sei realiza iha loron 8 fulan agosto tinan ida nee.
Batik Air Voo diretu Kuala Lumpur – Dili lori atleta rua neebe hetan patrosíniu husi Garmin mai Timor-Leste nuudar preparasaun nasaun nian ba Prezidensia ASEAN iha tinan 2029.
Tuir komunikadu neebe STL asesu husi media Prezidente Republika Segunda (03/08/2026) hatete, Komite Organizador ba Maratona Internasional Dili 2026 konfirma parseria ba apoiu serbisu neebe istoriku ho Batik Air Malaysia no ninia kompania alin, Malindo Air neebe sei lori maratonista rua husi Azia mai Timor-Leste liu husi servisu voo diretu Kuala Lumpur-Dili.
Atleta no koredor neebe hetan patrosíniu husi Garmin mak Abdul Jalil Bin Md Nasir no Muhammad Asyraf Bin Mustapha Kamal, neebe hela iha Kuala Lumpur, sei too iha Dili iha loron Tersa-feira, 5 Agostu 2026 no fila fali iha loron Segunda-feira, 10 Agostu 2026. Sira sei kompete iha kategoria Maratona no Meia-Maratona nuudar korredor elite ASEAN+ primeiru neebe dedikadu ba eventu nee.
Maratona Internasional Dili 2026 akontese iha momentu ida neebe define trajetoria rejional Timor Leste nian. Iha loron 26 Outubru 2025, iha Simeira ASEAN ba dala 47 iha Kuala Lumpur, Timor Leste ofisialmente sai nuudar Estadu Membru ASEAN ba dala 11, no nasaun nee iha ona orariu atu asume Prezidensia ASEAN iha tinan 2029 halo edisaun korrida ida-nee sai primeiru neebe halao iha momentu konfirmadu ona atu tama ba Prezidensia ASEAN. Tanba nee, Komite Organizador estabelese ona programa 2026 nian hodi bazeia ba pilar ASEAN+ neebe esplísitu-konvida, simu, no selebra atleta sira husi bloku laran no ninia parseiru dialogu sira, nuudar ensaiu ba Timor-Leste nia ospitalidade, infraestrutura no ligasaun entre povu neebe sei sai baze iha tinan 2029.
Batik Air Malaysia ofrese billete ida-fila (return tickets) ba atleta rua nee liuhusi ninia servisu diretu Kuala Lumpur–Dili, neebe opera dala tolu iha semana ida nia laran husi Aeroportu Internasional Kuala Lumpur (KLIA 1).
Rota Kuala Lumpur Dili hanesan rota foun ida no ligasaun aereu rejional neebe estratejikamente importante tebes hodi liga Timor Leste ho ASEAN. Servisu diretu nee fasilita atleta sira, viajor negosiu, delegasaun governu, reprezentante media, no turista sira atu halo viajen entre Kuala Lumpur no Dili hodi la presiza tranzitu iha nasaun seluk. Nuudar Timor-Leste prepara an ba ninia Prezidensia ASEAN iha 2029, konektividade aereu neebe diak liu sei desempenha knaar vital hodi apoia turizmu, komersiu no kolaborasaun rejional.
Batik Air Malaysia mak kompania aviasaun ho servisu kompletu, neebe liga Malazia ba rede luan ho destinu 60 resin iha nasaun 20 resin. Liuhusi servisu diretu Kuala Lumpur-Dili, Batik Air desempenha knaar importante ida atu hametin konektividade rejional no fasilita turizmu, negosiu, no interkambiu kultural entre Malazia, Timor-Leste no rejiaun ASEAN tomak.
Datuk Chandran Rama Muthy, Xefe Ezekutivu (CEO) Batik Air Malaysia, hatete Batik Air kontente bele sai parte iha Maratona Internasional Dili 2026, eventu ida-neebe selebra rezistensia, moris saudavel, no espíritu eselensia desportiva nian.
“Ami fiar katak inisiativa sira hanesan nee laos deit kona-ba kompetisaun. Sira enkoraja ema atu nafatin ativu, moris saudavel, no selebra dedikasaun no perseveransa atleta sira-nian. Ida-nee fo inspirasaun tebes atu haree eventu desportivu halibur atleta no komunidade sira husi rejiaun tomak,” dehan nia.
Nia hatutan, Rota Kuala Lumpur-Dili reprezenta ligasaun importante ida entre Malazia no Timor-Leste, fo konveniensia boot ba viajor sira hodi kria oportunidade barak liu ba turizmu, negosiu, no interkambiu kultural.
“Ami hein atu kontinua apoia inisiativa sira neebe hakbesik ema ba malu no hametin ligasaun rejional sira,” katak nia.
Garmin Malaysia mak parseiru smartwatch ofisial ba atleta rua neebe kompete iha Maratona Internasional Dili 2026. Atleta rua nee sei eklipa ho Garmin fēnix 8, smartwatch GPS ba liur (outdoor) neebe avansadu hodi ajuda atleta sira treina, fo dezempenu, no navega ho konfiansa.
Garmin orgulhu atu apoia atleta sira ho teknolojia neebe konfortavel hodi ajuda sira treina, halai korrida, no rekupera ho konfiansa. Liu husi kolaborasaun ida-nee, Garmin kontinua promove dezenvolvimentu desportu rezistensia nian, no iha tempu hanesan fo kbiit ba korredor sira atu atinji sira-nia objetivu,” tenik Sheena Sim, Lider Ekipa Merkadu husi Garmin Malaysia.
Nunee mos Afrânio Amaral, Diretor Korrida no Prezidente Federasaun Atletizmu Timor-Leste, konaba parseria ba Maratona Internasional Dili 2026 hatete sente haksolok simu elit Asean rua.
“Atu simu elite ASEAN rua neebe hetan patrosíniu husi Garmin iha lalaok inaugural ba servisu diretu Kuala Lumpur – Dili husi Batik Air Malaysia mak momentu loloos ASEAN+ neebe ita harii ba korrida 2026 nian. Nuudar Timor-Leste prepara ba tinan Prezidensia ASEAN 2029, parseria hanesan nee- aviasaun, teknolojia desportiva no talentu atletiku mak hatudu ba rejiaun katak ita prontu ona,” dehan Afrânio Amaral.
Maratona Internasional Dili mak eventu halai tarata prinsipal Timor Leste nian, organizadu anualmente, edisaun 2026 sei halao iha loron 4-8 Agostu 2026 no inklui kategoria Maratona, Meia-Maratona, 10 km (Para-Atleta sira), no Fun Run 5 km, ho orariu hahu korrida nian iha tuku 5:30 dadeer (Maratona), 5:45 dadeer (Maei-Maratona), 6:00 dadeer (Para-Atleta 10 km), no 7:00 dadeer (Fun Run). Tema tinan 2026 mak “Love Our Forests and Wildlife ou “Hadomi Ita-nia Ai-Laran no ita-nia Balada Fuik Sira”.
(eme)
