BAUKAU, STLTIMORLESTE.com – Iha loron 03 Fevereiru 2025, Servisu Edukasaun Munisipiu Baukau ofisialmente lansa ona programa merenda eskolar ba estudante sira iha Baukau.
“Ministeriu Edukasaun nia hakarak implementasaun iha Janeiru, maibe prosesu administrasaun difikulta, entaun ohin (03/02) halo lansamentu ba programa merenda eskolar,” hatete Diretor Servisu Edukasaun Munisipal Baukau, Afonso dos Santos da Costa hafoin lansa programa merenda eskolar iha eskola ensinu baziku Treseiru Siklu 03, Vila Nova ,Baukau, Segunda nee (03/02/2025).
Afonso informa, implementasaun programa merenda eskolar ba anu letivu 2025 iha Baukau ho aloka orsamentu hamutuk US$ 261. 990.00, konsege transfere ona ba konta bankaria eskola sira liu 230, hanesan eskola pre-eskolar, ensinu baziku kompostu privadu no publiku.
Benefisiariu ba programa refere estudante hamutuk rihun 32.730, neebe kada loron estudante nain ida sei han osan sentavus US$ 0.42 ba loron efetivu 150 tuir menu implementa iha programa refere 75% ho produtu lokal husi produtu sira hanesan ai-haan fo protesaun, haburas no ai-haan haforsa nian.
“Hanesan etu iha, tenke iha naan, manu tolun, aifuan ho modo tahan, neebe implementa nee 75% tenke hahan lokal,” Afonso informa.
Reprezentante Prezidente Autoridade Munisipiu Baukau, atual Sekretaria Munisipal Asuntu Sosial Maria Viegas husu implementador programa merenda eskolar sira atu nafatin kumpri ijiene no garante oferese ai-haan nutritivu ba estudante sira husi produtu lokal maioria 75%, nunee orsamentu husi programa merenda eskolar fo benefisiu ba komunidade agrikultor sira iha Baukau.
Tanba programa refere implementa husi tinan 2024 ba kotuk, orsamentu neebe aloka kuaze sai hotu ba rai liur, ba produtu sira hanesan tomate no seluk tan, sosa husi rai liur neebe fo impaktu ba ekonomia rai laran.
“Ohin lansamentu ida nee, husu programa merenda eskolar nee tenke mai duni husi hahan lokal nian, tenke haree moos mak fo ba ita nia oan sira, tanba futuru mai sira mak iha ita nia fatin,” hatete Maria Viegas.
Reprezentante Prezidente Autoridade Munisipal nee rekonhese, implementasaun programa merenda eskolar ba anu letivu 2024 tarde liu, tanba implementa hahu iha fulan Maiu, maibe ih anu letivu tinan 2025 lansa ona iha fulan Fevereiru, nunee garante anu letivu 2026 sei implementa iha fulan Janeiru.
Nia konsidera, alokasaun orsamentu merenda eskolar neebe fila ba kofre estadu nee impaktu, tanba lakon estudante benefisiariu sira nia direitu no konsidera ezekusaun ladun diak.
Benefisiariu Estudante Melania da Silva Belo sente kontente ho programa merenda eskolar anu letivu 2025, tanba implementasaun sedu kompara ho anu letivu 2024 neebe implementa iha fulan Maiu.
Entretantu lansamentu programa merenda eskolar anu letivu 2025 iha Munisipiu Baukau, neebe realiza iha eskola ensinu baziku sentral terseiru siklu Vila Nova Baukau nee, hetan partisipasaun masimu husi direjente eskola sira iha Munisipiu Baukau.
(EST 2)