DILI, STLTIMORLESTE.com – Banco Central de Timor-Leste (BCTL) organiza enkontru Governadór Banku Sentrál Pasífiku nian ba dala 41, iha Palm Spring Hotel, Fatuhada, Dili, Sesta-feira (9/10/2026).
Enkontru ne’e foka ba asuntu prinsipál tolu: suporta kresimentu ekonomiku, hametin reziliénsia hasoru krize no promove adosaun teknolojia iha servisu finanseiru.
Governadór BCTL, Hélder Lopes hatete katak, enkontru anual ne’e sai oportunidade atu halibur governadór banku sentrál sira, hodi diskute asuntu relevante ba mandatu no responsabilidade instituisaun sira-nian.
“Tema tinan ida-ne’e foka ba kresimentu ekonomiku, reziliénsia no inovasaun teknolojia,” dehan Hélder Lopes.
Nia esplika katak, banku sentrál sira iha papel importante atu servisu hamutuk ho governu no entidade relevante sira, hodi suporta kresimentu ekonomiku iha nasaun ida-idak.
Ba Timor-Leste, BCTL servisu hamutuk ho governu no setór privadu atu kontribui ba dezenvolvimentu ekonomiku nasionál.
Iha aspetu reziliénsia, Hélder hatete katak preparasaun hasoru krize ekonomika importante, liuliu atu asegura disponibilidade rekursu finanseiru bainhira situasaun difísil mosu.
Nia fó ezemplu kona-ba jestaun Fundu Petrolíferu, ne’ebé BCTL jere, no kooperasaun ho governu atu asegura rezerva sufisiente ba nesesidade nasaun.
“BCTL servisu hamutuk ho governu atu asegura rezerva sufisiente hodi utiliza bainhira situasaun presiza,” nia dehan.
Kona-ba inovasaun, Hélder temi implementasaun teknolojia finanseira, inklui lansamentu TuQR no no Ti-FAST, nu’udar parte husi esforsu atu moderniza sistema pagamentu no servisu finanseiru.
Nia afirma katak, enkontru ne’e oportunidade atu fahe esperiénsia kona-ba digitalizasaun ho nasaun sira iha rejiaun Pasífiku, liuliu iha aplikasaun teknolojia ba servisu finanseiru.
“Importante atu fahe ita-nia esperiénsia ho kolega sira iha nasaun ilha Pasífiku,” dehan Hélder.
Enkontru ne’e sei hala’o durante loron tomak. Iha okaziaun ne’e, prevista mós asinatura akordu kooperasaun entre banku sentrál Fiji, Samoa no Papua-Nova Guiné.
Kooperasaun entre Fiji no Samoa sei permite troka informasaun no koñesimentu. Enkuantu, Papua-Nova Guiné hatudu interese atu aprende kona-ba esperiénsia Timor-Leste nian iha jestaun Fundu Petrolíferu.
Hélder esplika katak, interese ne’e mós iha ligasaun ho vizita Prezidente Repúblika, José Ramos-Horta, ba Papua-Nova Guiné, ne’ebé durante ne’e lideransa nasaun ne’e manifesta interese atu aprende kona-ba jestaun fundu petrolíferu Timor-Leste nian.
Enkontru ne’e la’ós de’it envolve nasaun ilha Pasífiku, maibé mós Australia no Nova Zelándia, ne’ebé iha esperiénsia kona-ba adosaun teknolojia iha servisu finanseiru.
Hélder hatete katak, Timor-Leste bele fahe esperiénsia ho nasaun sira seluk no aprende husi prátika sira-nian, atu hametin kapasidade banku sentrál no suporta dezenvolvimentu ekonomiku sustentavel.
(dom)
