DILI, STLTIMORLESTE.com – Banco Central Timor-Leste (BCTL) sei hamutuk ho banku komersiál sira promove TuQR atu aumenta utilizasaun no seguransa pagamentu dijitál iha Timor-Leste.
Vise-Governadora Banco Central de Timor-Leste (BCTL), Sara Lobo Brites, hatete katak instituisaun ne’e kontinua haluan utilizasaun TuQR ba individu no negósiu ki’ik sira.
Nia dehan katak, BCTL servisu hamutuk ho banku komersiál sira atu hasa’e koñesimentu públiku kona-ba benefísiu no seguransa sistema pagamentu dijitál.
“BCTL servisu hamutuk ho banku komersiál sira atu disemina informasaun kona-ba utilizasaun sistema dijitál ho seguransa,” Sara Lobo Brites hatete iha Palm Spring Hotel, Fatuhada, Sesta (09/10/2026).
Sara esplika katak, utilizasaun TuQR seidauk avansa lalais tanba sistema ne’e envolve instituisaun rua de’it, mak Banco Nacional de Comércio de Timor-Leste (BNCTL) no BCTL.
Tanba ne’e, BCTL presiza envolve banku komersiál seluk atu adopta TuQR, nune’e komunidade bele asesu no utiliza sistema pagamentu dijitál ho fasilidade.
Nia mós husu jestaun merkadu no komérsiu sira atu kolabora ho banku komersiál hodi hala’o kampaña informativa ba públiku, liuliu ema sira ne’ebé seidauk komprende sistema ne’e.
“Ita nota katak inovasaun hanesan ne’e ema barak dala ruma seidauk bele utiliza tanba sira tauk,” Sara hatete.
Nia esplika katak, rai osan iha uma ka kaer osan físiku mós iha risku, no uza inséndiu ne’ebé akontese foin lalais iha Merkadu Tasibesi nu’udar ezemplu.
Tuir Sara, rai osan de’it iha uma ka iha kaisa la ajuda osan movimenta iha ekonomia. Nia konsidera pagamentu dijitál nu’udar alternativa ne’ebé presiza komunidade muda mentalidade.
Nia hatutan katak, BCTL no governu sei servisu hamutuk ho ministériu relevante sira, inklui MKAE, atu aumenta asesu ba instrumentu pagamentu eletróniku iha merkadu no loja sira.
Sara dehan katak, loja boot no merkadúria barak seidauk disponibiliza instrumentu pagamentu eletróniku, ne’ebé bele limita utilizasaun sistema dijitál.
“Bainhira loja boot sira la tau produtu sira ne’e, investimentu ba infraestrutura ne’e sai saugati de’it tanba ema la utiliza,” nia dehan.
Nia informa katak, BCTL hamutuk ho ministériu relevante sira sei aprezenta dekretu-lei ida atu regula matéria pagamentu dijitál iha tempu badak.
Tuir Sara, dekretu-lei ne’e sei buka obriga loja sira atu disponibiliza opsaun pagamentu dijitál ba kliente, atu fasilita asesu no promove utilizasaun sistema eletróniku.
Iha sorin seluk, sidadaun Tarsiziu da Costa konsidera diseminasaun informasaun kona-ba sistema dijitál importante atu ajuda komunidade komprende benefísiu rai osan iha banku.
Nia dehan katak, sidadaun barak seidauk iha koñesimentu sufisiente kona-ba pagamentu dijitál, liuliu komunidade iha baze.
“Pagamentu dijitál bele ajuda asegura osan, maibé presiza tempu atu komunidade komprende no aprende uza sistema ne’e,” Tarsiziu da Costa hatete.
Nia husu banku sira atu kontinua halo kampaña informativa to’o iha komunidade baze, tanba falta koñesimentu no rumor kona-ba banku bele halo ema balu tauk atu rai osan iha instituisaun finanseira.
(dom)
