DILI, STLTIMORLESTE.com – Bebak dodok sai didin eskola iha EBF 1.2 Daga-Messa, Mau-Ulo, halo estudante no manorin aprende iha laran tauk tanba risku boot ka tauk eskola monu.
EBF 1.2 Daga-Messa iha Suku Mau-Ulo, Postu Ainaro, Munisipiu Ainaro, ho didin deit bebak dodok.
Sala tolu obriga fahe ba turma neen, ho didin meia parede ne’ebé anin bele loke, halo eskola la seguru ba labarik sira.
Xefe Suku Mau-Ulo, Luís Valadares Colaço kritika makaas Ministeriu Edukasaun taka matan. Labarik ba eskola laos atu aprende deit, maibe tau vida iha risku nia laran.
“Kada sala ida uza ba turma rua. Sala eskitoriu laiha. Tanba klase rua okupa sala ida, alunu sura labele intende materia ho diak.”dehan Luís ba STL, liu husi telefone, Segunda (05/10/2026).
Xefe Suku nee afirma, manorin rua obriga hanorin hamutuk iha sala ida, lian hakilar malu, halo estudante la fokus no manorin laiha espasu dignu atu servisu.
Bainhira anin no udan mai, eskola bele monu. Nia husu ho seriu,”Ami husu ba Ministeriu Edukasaun, atu toma responsabilidade ho seriu no halo konstrusaun dignu ba eskola refere.”hatete Xefe Suku nee.
Iha parte ketak, Observador Politika, Manuel Martins, dehan kondisaun ne’e hatudu fallansu boot, iha jestaun edukasaun nasional.
“Governu koalia kona-ba edukasaun kualidade, maibe realidade iha Mau-Ulo kontrariu. ME tenke tun ba baze haree rasik.”Manuel dehan.
Nunee mos Akademista UNPAZ, Rosalina da Cruz, hateten kestaun ne’e laos deit infrastrutura, maibe kestaun direitu umanu no rekursu umanu nian.
“Labarik estuda iha sala ida ho turma rua, konsentrasaun fahe ba rua. Estadu iha obrigasaun asegura eskola seguru ba hotu.”dehan nia.
Entretantu too notisias nee publika, STL seidauk konsegue konfirma asuntu nee ho Ministeriu Edukasaun.
(car)
