BAUCAU, STLTIMORLESTE.com – Veteranus Fernando “Beredu’u” Gusmão sente triste tebes ho lakon eis Prezidente Republika no Prezidente Partidu FRETILIN, Francisco Guterres Lu-Olo, neebe durante nia lideransa hatudu simplisidade no la hatene foti aan.
Iha deklarasaun ida ba jornalista sira iha Vila Nova, Baucau, Tersa (23/06/2026), Fernando “Beredu’u” hateten, saudozu Lu-Olo laos deit lider Partidu FRETILIN no eis Prezidente Republika, maibe mos nuudar luta nain ida neebe hamutuk ho maluk sira seluk liberta povu no rai Timor-Leste husi kolonializmu too hetan independensia.
“Nee ita nia luta nain, ita nia boot. Ami nia maluk veteranus sira triste, maibe ida nee Maromak nia planu. Lakon ida nee ba povu no nasaun. Nia ema simples, la hanesan ema boot neebe gaba aan,”hateten Fernando “Beredu’u” ho laran susar.
Tuir nia, durante soudozu Lu-Olo nia mandatu nuudar Prezidente Republika, Lu-Olo sempre hatudu simplisidade no respeitu ba ema hotu, no iha prosesu demokrasia sira mos la hatene insulta ka menuspreza nia maun alin luta nain sira.
Fernando “Beredu’u” konsidera katak, Lu-Olo mate nuudar lakon boot ida ba povu no nasaun. Simplisidade no valor sira neebe nia husik hela tenke sai legadu ba jerasaun foun no lider politiku sira atu kontinua promove unidade nasional.
“Ami nia maluk veteranus sira hanoin katak saudozu hakarak atu lider partidu sira hamutuk iha semiteriu hodi hakoi nia,” rekomenda Beredu’u.
Veteranus nee hateten katak, Konsellu Munisipal Kombatentes Libertasaun Nasional Baucau aviza ona ba veteranus sira iha Munisipiu atu prepara ba Dili hodi akompanha prosesu funebre saudozu nian tuir data ofisial neebe Estadu Timor Leste determina.
Nia dehan partisipasaun veteranus sira iha funebre nee importante tanba sai momentu despedida ikus ba maluk luta nain ida neebe fo kontribuisaun boot ba independensia nasaun.
Iha parte seluk, Fernando “Beredu’u” espresa preokupasaun kona-ba informasaun no polemika oioin neebe atual espalha iha media sosial relasiona ho saudozu nia mate, tanba nee husu ba autoridade kompetente, liu liu Polisia Sientifica Investigasaun Kriminal, atu investiga fonte informasaun sira neebe iha atu evita konfuzaun no diskriminasaun hasoru lider rezistensia sira.
“Hau husu ba partidu sira labele lansa informasaun ne’ebé la favorese ba ita nia lider sira, tanba informasaun la loos bele afeta reputasaun no moris ema nian,” hateten nia.
(tom)
