OE-CUSSE, STLTIMORLESTE.com — Suku Bobometo prepara monumentu, igreja no museu atu preserva memória vítima Masakre Tumin ba jerasaun foun.
Xefe Suku Bobometo, José Caet hateten, restu mortais vítima sira rai temporariamente iha sede suku, tanba konstrusaun seidauk remata.
“Restu mortais sira agora rai iha sede suku, tanba igreja no monumentu sei halo hela konstrusaun.”
José Caet koalia ba STL iha Sede Suku Bobometo, Kuarta-feira, 7 Outubru 2026.
Nia hateten, Masakre Tumin akontese iha 8 no 9 Setembru 1999, ho vítima sira mate iha área refere.
Tuir José, restu mortais vítima sira rekolla no rai hamutuk, atu preserva memória istórika ba komunidade no jerasaun tuirmai.
Nia esplika, total vítima ne’ebé mate iha akontesimentu ne’e hamutuk ema 82, ho parte restu mortais rai iha sede suku.
“Objetivu konstrusaun monumentu, igreja no museu mak atu preserva istória no ajuda jerasaun foun hatene akontesimentu sira.”
José hateten, infraestrutura ne’e sei inklui monumentu, museu, igreja, hadi’a rate no muro, atu sai fatin memória istórika.
Iha parte seluk, Prezidente Autoridade RAEOA, Régio da Cruz Salu, promete suporta konstrusaun Sentru Reflesaun Istória Masakre Tumin.
Promesa ne’e hato’o iha komemorasaun dala-26 Masakre Tumin, iha 9 Setembru 2025, hamutuk ho família vítima sira.
Komemorasaun realiza ho misa no kari ai-funan, hodi onra vítima sira ne’ebé mate durante akontesimentu 8 no 9 Setembru 1999.
“Orden Primeiru-Ministru, ita sei kombina fatin Masakre Tumin atu harii Sentru Reflesaun Istória Luta ba Libertasaun Nasionál.”
Régio mós informa katak, eis-Prezidente Autoridade, Rogério Lobato, promete ona verba atu hahú dezenvolvimentu Sentru Reflesaun iha Bobometo.
Nia hatutan katak, verba US$100 mil sei inklui iha enkuadramentu tomak, atu inisiativa Sentru Reflesaun bele hahú.
“Verba ne’e tenke haree tuir paresér jurídiku, atu bele hahú implementasaun ba Sentru Reflesaun.”
Nia konsidera Sentru Reflesaun hanesan investimentu ba memória istórika no potensial turizmu istóriku iha Oecusse.
(jen)
