DILI, STLTIMORLESTE.com – Bolsa kandidatu profesores neebe mak daudaun nee hanorin nivel ensinu baziku iha Postu Administrativu Maubessi, hanorin distansia neebe dook husi sira nian hela fatin.
“Ita nian bolsa kandidatu profesores balun hela kost besik eskola ka fatin hanorin neebe mak besik, nee duni sira ba hanorin ita nian estudante sira la tarde, maibe iha Postu Maubessi nee mak ita nian profesores balun ba hanorin distansia neebe mak dook, nee mak iha, konaba dadus ita nian profesores nain hira mak hanorin ho distansia dook, nee ita presiza haree fali dadus tuir ida-idak, atu nunee ita bele hatene lo-loos ninia dadus nee,” dehan nia.
Nia dehan, nee duni profesores neebe mak agora daudaun hanorin iha ensinu baziku iha Postu Administrativu Maubessi, Munisipiu Ainaro, balun ho distansia neebe dook husi eskola no sira nian hela fatin, nee iha parte Maubessi nian deit, agora ninia kuantidade nee mak ladun hatene lo-loos hira.
“Nee iha area Maubessi nian, tanba iha fatin balun nee hanorin besik hela sira nian hela fatin, balun mak hanorin iha vila, depois ba hanorin fali iha suku sira nee, nee ita nian nivel ensinu baziku deit, nee bolsa kandidatu deit, seluk nee lae, maibe ita nian profesor sira nee maske ba hanorin ho distansia neebe mak dook, maibe sira halao sira nian knaar ho diak liu tan, dader sira ba hanorin, depois sira fila fali,” nia informa.
Iha fatin la hanesan, Diretor Servisu Edukasaun Munisipiu Liquiça, Julio da Silva hatete, Servisu Edukasaun Munisipiu Liquiça la halo identifikasaun ba profesores neebe hanorin ho distansia dook, tanba profesor sira tenke hatene ninia oras hanorin estudantes sira.
“Hau hanoin ami la halo identifikasaun konaba ita nian profesores sira nian distansia hanorin nee dook ka besik, tanba ita nian profesores sira tenke hatene ona katak, ninia oras atu hanorin estudantes nee tuku hira, nee ita nian profesores ida-idak tenke hatene ida nee, para dader tama sedu eskola, hodi halao ensinu aprendizajen ba ita nian estudantes sira, tanba nee ami la identifika ida nee,” nia dehan.
Julio hatutan, Servisu Edukasaun Munisipiu Liquiça la identifika profesores nain hira mak distansia hanorin nee dook ka besik, nee sira la halo identifikasaun konaba ida nee, maibe profesores ida-idak hatene ona sira nian oras servisu, hanesan oras hanorin estudantes sira nee, dader tama sedu eskola, nee profesores sira hatene ida nee.
Iha parte ketak, Miguel Freitas nuudar Diretor Servisu Edukasaun Munisipiu Bobonaro hatete, profesores sira nee balun neebe hanorin estudantes sira ho distansia neebe mak dook, depois sira seidauk iha rezidensia.
“Konaba distansia no sira nian hela fatin nee atende ona balun, tanba iha eskola lima ka neen iha ona planu atu tau rezidensia ba ita nian profesores sira nee iha eskola idak-idak, nee ba tinan ida nee, ezemplu hanesan eskola sira iha Munisípiu Bobonaro, hanesan Hauba, Kolimau, Palaka, Postu Kailaku, Bobonaro, nee iha hotu, nee trasa hotu ona, nee ba ita nian profesores bolsa kandidatu sira nian fatin, nee ba ita nian profesores nibel ensinu baziku ninia,” dehan nia.
(jac)
