DILI, STLTIMORLESTE.com – Boxista Timoroan husi El-Matador Boxing Club ho naran istimadu Deniel de Asis Belo, susesu iha jogu Boxe HSS Bali hodi tuku monu nia adversariu Sakti Manullang husi Indonezia iha riin leten iha ronde 3.
Tuir kriteria jogu entre Boxista Deniel ho nia adversariu tenke joga too ronde da-haat, maibe ho forsa neebe iha, Deniel konsege hamonu Sakti iha ronde 3.
Durante jogu lao, Boxista nain rua lansa kontra no atake ba malu iha riin leten, maibe Deniel hatudu nia forsa neebe brilhante iha ronde 3. Vitoria nee fo ksolok tebes ba povu Timor Leste.
Boxista husi klubu El-Matador Boxe nee tenke loke liras, hafalun ho bandeira Republika Demokratika Timor Leste (RDTL) iha nia isin, akompanha husi nia treinador Abilio Orlando dos Santos haksoit iha riin leten bainhira nia Boxista manan ho rezultadu KO.
Ho vitoria nee, Sekretariu Jeral klubu Boxe El-Matador Zesito Silva hateten, Manu Aman Timor futu ona konsege hatun Manu Aman husi Indonezia.
“Ita nia Manu Aman Timor (Deniel) ohin ita futu ona, ita manan ho Knock out. Atleta Timoroan nee siak, ita hamutuk ho sira sai siak liu tan,” Sekretariu Jeral nee hateten ba TATOLI via media WhatsApp, Domingu kalan (09/02/2025).
Nia dehan tan, “aproveita meiu ida nee, hakarak fo obrigadu ba povu Timor Leste, Rai Lulik no matebian sira hotu. Imi hotu nia tulun, ita sempre hamorin Timor iha mundu, liu husi Boxing”.
Nia hatutan, la haluha agradese ba parte hotu neebe apoia ba klubu El-Matador partikularmente atleta nain-rua. Ema hotu nia apoia mak Boxita sira sei forsa liu tan. Nia mos agradese ba apoiu husi Governu Timor Leste, liu husi Primeiru Ministru, Kay Rala Xanana Gusmão neebe apoiu Boxista Timoroan iha eventu nee.
(STL)
