DILI, STLTIMORLESTE.com – Boxista Timor oan nain rua (2) husi Klubu Boxing El-Matador marka istoria foun hafoin oferese sintu HSS pro ba Timor Leste, iha palku Hw Sport Night (HSN) Bali, Indonezia.
Boxista “El Bruto” ho naran kompletu Delio Anzaqeci Mouzinho ho Daniel de Assis Belo halakon boxista nain rua husi Indonezia ho klase neebe difrente iha palku Hw Sport Night (HSN) Bali, Indonezia.
Boxista Timoroan nain rua ho naran Kompletu Delio Anzaqeci Mouzinho konsege hadau sintu OPBF WBC husi Boxista Saroha Lumbantobing husi Indonezia, Boxista ho naran Daniel de Assis Belo oferese sintu HSS pro ba Timor Leste hafoin halakon boxista Prastio, iha palku Hw Sport Night (HSN) Bali, Indonezia.
Vitoria neebe Boxista “El Bruto” hetan bainhira kompete ho boxista husi nasaun Indonezia ho naran Saroha Lumbantobing no iha kompetisaun nee “El Bruto” konsege hatudu prestasaun neebe diak hodi manán Saroha ho pontu diferente.
Enkuantu Boxista “El Asasino” hetan vitória hafoin halokon boxista Indonézia Prasito, ho TKO iha ronde datoluk, ho vitória TKO nee absoluta nee “El Asasino” iha direitu absoluta manán sintu ida neebe signifikante.
Boxista Delio Anzaqeci Mouzinho hatete, vitoria neebe nia hetan laos deit sai orgulhu ba boxista nain rua, maibe sai momentu istoriku ba Boxing Timor Leste.
“Hau nia nasaun kiik liu iha mundu, ema barak seidauk konhese. Ohin loron hau hamriik iha nee ho vitoria atu halo ema konhese liu tan hau nia nasaun,” Katak nia iha Bali, hafoin remata kompetisaun, Segunda (27/07/2026).
Nia dehan, vitoria refere nia parte oferese espesialmente ba povu Timor Leste.
Boxista nee dehan katak, vitoria refere liu husi dezafiu oi-oin, tanba dala barak ema barak ko’alia nia, maibé nia sempre hamrik metin hodi kontinua treinu.
“Bainhira hau lakon ema barak mak koalia aat hau, maibe hau nia treinador no familia sempre fo motivasaun ba hau, ohin hau bele hamriik fila fali ho vitoria,” Delio dehan.
Iha fatin hanesan, Boxista “El Asasino” ho naran Daniel de Assis Belo hatoo agradese ba Maromak no Timoroan neebe apoiu makaas ba nia.
“Dahuluk agradese ba Maromak, tanba ohin kalan hau bele hetan tan vitoria ida nee. Hau mos la haluha hatoo obrigadu ba ekipa HSN neebe fo tan oportunidade mai hau atu halao hau nia jogu iha nee,” hateten nia.
(alb)
