DILI, STLTIMORLESTE.com – Embaixadora Timor Leste ba Brazil, Maria Angela Guterres Viegas Crascalão hatete, Prezidente Brazil Luiz Inacio Lula da Silva iha vontade boot apoiu Timor Leste iha setor Justisa, formasaun lian Português no seluk tan.
Embaixadora Timor Leste ba Brazil, Maria Angela Guterres Viegas Crascalão ba jornalista sira iha Palasiu Prezidensial Nicolau Lobato, Bairo Pite, Tersa (07/07/2026) hatete, Brazil iha vontade boot apoiu Timor Leste iha setor oin oin.
Embauxadora hatete, durante nia mandatu nuudar Embaixadora Timor Leste ba Brazil, buka halo kooperasaun metin ho Brazil.
“Prioridade kooperasaun ho Brazil liu-liu relativamente ba edukasaun, ensinu portuguesa, liu-liu ba justisa nomos defeza, tuir Prezidente Brazil, Luiz Inacio Lula da Silva iha vontade ajuda Timor Leste,” dehan Embaixadora.
Kuandu koalia relativamente ba re-intrudusaun lian Português, brazil iha vontade atu ajuda Timor Leste maibe laos deit ajuda lian Português, maibe justisa mos buat ida neebe importante.
“Tuir ita boot sira hatene katak durante tinan balun dezde 2002 defensoria publika husi Brazil apoiu ita ho defensor sira mai iha nee para ajuda ita iha defensoria publika, ita konsege ho ministeriu justisa afirma oitava da etapa mais 13 defensoria publiku konseitu ida neebe hanesan mos defensoria publiku ba ema kiak sira neebe laiha kbiit hodi bele hatoo ba Advogadu sira, entaun defensoria publiku mak bele ajuda sira,” dehan Embaixadora.
Embaixadora hatete, nia iha Brazil tenta koalia beibeik hodi promove Timor Leste, maske rai kiik oan ida maibe nia iha intrese atu fo hatene istoria Timor Leste nia, dezde tempu português too okupasaun too mai ohin loron indepedensia no esforsu Timor Leste nia bele harii estadu Direitu Demokratiku nomos razaun oinsa mak bele sai hanesan estadu indepedente.
“Ida nee hau nia vontade, hau nia intrese atu promove istoria Timor Leste iha brazil, iha Brazil hau haree katak Prezidente Lula kuandu hau aprezenta kredensial Prezidente mos dehan katak saida mak Timor Leste presiza, Prezidente Lula bele ajuda ita, ida nee hau haree sira iha vontade atu ajuda Timor Leste,” katak Embaixadora.
Nia hatutan, ajuda iha parte hotu neebe Timor Leste presiza, ezemplu Juiz, bele ajuda mos profesores no bele ajuda estudante Timor oan bele ba estuda iha Brazil.
Aleinde nee kooperasaun Timor Leste ho Brazil daudaun nee Embaixadora mos tenta atu apoiu buat ida neebe importante ba Timor Leste, tanba Brazil produtor kafee iha mundu, entau sira bele ajuda Timor Leste oinsa bele harii plantasaun kafee oin oin, oinsa mak sira bele ajuda Timor Leste iha Agropekuaria, oinsa mak sira bele ajuda Timor Leste parte seluk laos deit ensinu justisa no lian português, maibe parte seluk tan.
(eme)
