DILI, STLTIMORLESTE.com — Dezde Konselhu Kombatente Libertasaun Nasional (CCLN – sigla português) halo reabilitasaun ba areador hodi selebra Loron Nasional Veteranus iha 3 Marsu liu ba, CCLN laiha ona estasionamentu, autoridade seguransa la admiti ona motor no kareta husi veteranus sira tama ba areador CCLN.
Veteranus neebe hakarak trata asuntu ruma iha Banku Nosso Futuru ou Ministeriu Asuntu Combatente Libertasaun Nasional ka CCLN, tenke para hotu iha estrada, tanba areador CCLN, MACLN no BNF ba deit ema sira neebe servisu iha instituisaun sira nee.
Kareta no motor neebe autoriza tama ba areador CCLN, MACLN no BNF nee kareta no motor neebe identifikadu hanesan funsionariu ba CCLN, BNF no MACLN, enkuantu kareta no motor husi veteranu sira para hotu iha estrada.
Seguransa sira autoriza motor balu tama ba laran, mas tenke ba para fali iha espasu balu iha liur neebe laiha kondisaun, enkuantu motor no kareta neebe para iha estrada laran okupa tiha estrada isin lolon, hodi fo impaktu ba movimentu transporte publiku, tanba motor barak mak para iha liur okupa tiha estrada no laiha espasu ba movimentasaun kareta no motor.
Tuir observasaun STL iha terenu nota katak iha odamatan estrada tama ba iskritoriu CCLN, MACLN no BNF, iha ona vijilansia husi seguransa, tantu odamatan tama no no odamatan sai, iha ona seguransa hodi regula movimentasaun kareta no motor neebe atu tama no sai nunee mos regula mos transporte publiku sira hanesan mikrolet ou taksi neebe para hodi fo espasu ba movimentasaun transporte neebe atu sai no tama.
Tuir membru seguransa neebe lakohi temi naran katak sira simu ona ordem husi nain ulun sira atu limite sidadaun neebe uza transporte tama ba laran areador CCLN, MACLN no BNF, eseptu deit ba transporte husi funsionariu sira.
“Uluk nee bele, motor ho kareta bele tama ba laran para iha areador CCLN nian, agora labele, tanba iha laran kareta barak demais, laiha espasu ba ema atu halo movimentu,” hatete seguransa nee ba STL iha Komoro, Tersa (7/4/2026).
Enkuantu Hipolito Mendes dehan iskritoriu CCN iha mudansa signifikante, areador CCLN, uluk hanesan fatin ba arte moris nee sabraut, agora kaber ona no furak ema hare, espasu mos luan, maibe tanba ema barak, husi instituisaun tolu mak iha laran, maneira atu transporte privadu sira labele tama nee diak liu.
“Se kareta no motor tama hotu, iskritoriu sira nee ita hare hanesan tiha merkadu, nee ladun furak ema hare, agora diak ona, presiza mak kria estasionamentu ruma neebe seguru, nunee sidadaun neebe mai trata asuntu ruma iha ministeriu sira nee sente seguru,” dehan Hipolito.
Nia hatete, espasu balu iha oin naton ona atu muda ba estasionamentu, maibe presiza hadia halo diak monta mos seguransa, nunee sidadaun sira sente seguru atu para sira nia kareta ou motor, no labele para iha estrada laran hodi perturba movimentu transporte publiku.
(god)
