BAUCAU, STLTIMORLESTE.com – Konfederasaun Desportu Timor Leste (CDTL-sigla português) establese ona nia estrutura iha Munisipiu Baucau.
Primeiru Vise Prezidente CDTL, José Caitano Guterres aprezenta, estabelesimentu CDTL iha Baucau nee liu husi atividade hili estrutura ba objetivu atu dezenvolve desportu iha baze, tanba durante nee CDTL iha deit pontu fokal Munisipal neebe difilsil atu halao servisu asuntu Desportu nian iha baze.
“Ita hatene katak Baucau koinhesidu ho prestasaun, lakohi lakon no sempre hakarak kompete, tanba nee establese ida nee sai oportunidade atu kontribui prestasaun atleta desportu sira nian iha Baucau,” hateten Vise Prezidente CDTL, José Caitano Guterres ba jornalista sira hafoin remata entrega dokumentus ba estrutura Munisipal iha Vila Antiga, Tersa (16/06/2026).
Nia esplika, CDTL iha vizaun hakarak area desportu fo prestasaun diak ba Timor-Leste iha involmentu ASEAN ohin loron, nunee liu husi atividade nee bele hamutuk Ministeriu Juventude, Desportu Arte no Kultura, Ministeriu Edukasaun no Autoridade Munisipal, prepara atleta nasional ida neebe hatudu prestasaun desportu iha Mundu desportiva.
Nia sublina, mekanizmu establesementu CDTL iha Baucau nee liu husi maneira Asemblea hili kandidatura pakote liu husi kada membru Asosiasaun Desportu Baucau nian deskute rezimentu sira no eleisaun ba estrutura hanesan Prezidenti CDTL Munisipal ho nia Vise Prezidenti, Prezidente Juridiku, Komisaun Fiskal, Prezidente Asemblea ho Sekretariu ba mandatu prioridade ida tinan-haat, husi tinan 2026 too 2030.
“Ita esperansa estrutura nee bele akomoda Asosiasaun hotu hotu iha komunikasaun ba malu diak, ligasaun ho entidades sira neebe interese diak para kontribui ba dezenvolve desportu iha fururu,” José akresenta.
Primeiru Vise Prezidenti CDTL nee husu estrutura Munisipal atu hametin servisu diak ho entidades sira neebe iha vontade espiritu desportiva, nunee bele kontribui no dezenvolve desportu ida diak liu ba Timor-Leste iha Mundu.
Iha fatin hanesan, pontu fokal CDTL Baucau, João Cabral ‘Buka Tuir’ hateten, durante tinan-barak Asosiasaun desportu sira maioria abandonadu, nunee ho establesementu refere bele sai mahon no futuru organizadu ida ba area desportiva husi modalidade sira iha Baucau.
“Establesementu ida nee futuru ita iha esperansa ba dezenvolvementu desportu espesial ba Baucau,” João komenta.
CDTL rasik establese ona estrutura iha Munisipiu balu inklui Baucau, no planu sei kontinua establese iha Munisipiu neebe seidauk sei finaliza Munisipiu Liquiça.
Entretantu, total membru asosiasaun desportu iha Munisipiu Baucau hamutuk nain 13, kompostu Asosiasaun Futebol Munisipal Baucau, Basketball, Volleyball, Xadres, Suklismu, Tenis meza, Taekwondo no seluk tan husi total federasaun desportu nivel nasional hamutuk 31.
(tom)
