DILI, STLTIMORLESTE.com — Eis Deputadu husi Bankada CNRT atual Prezidente Movimentu Reafirmasaun Reformasaun Nasional (MORRENA), Cesar Valente, deklara katak asaun husi Deputadu balun neebe hatoo pedidu demisaun ba Ministru Prezidensia Konselhu Ministru (MPKM), Agio Pereira, hatudu momos katak Komisaun Politika Nasional (CPN) la funsiona ho diak ka lakon ona ninia karater auto-kontrolu ba partidu no hatudu mos ezistensia interese grupu nian iha laran.
Iha komentariu neebe hatoo ba publiku, Cesar Valente foka ba kestaun rua prinsipal, metodu organizasaun no funsionamentu interna partidu nian.
Kritika primeiru neebe hatoo mak hahalok Deputadu sira nian, neebe hatoo liafuan ka pozisaun iha publiku hodi husu demisaun. Tuir nia, hahalok nee sala tanba maun Xanana mak Prezidente Partidu, neebe lidera partidu boot iha Parlamentu Nasional ho Deputadu 31 vinkuladu ba estatutu partidu.
“Forum ka assembleia Komisaun Politika Nasional (CPN) la funsiona ho diak, ka lakon ona ninia karater auto-kontrolu ba partidu,” tenik Cesar Valente ba STL, Sesta nee (31/07/2026).
Nia sublina katak, organizasaun labele lao ho vontade ema ida nian mesak, maibe tenke liu husi forum ka assembleia CPN hodi hasai desizaun bazeia ba estrutura tomak nia opiniaun.
Maski Bankada CNRT iha Parlamentu Nasional koalia kona-ba asuntu nivel estadu ho orientasaun husi CPN, maibe iha sirkulu partidu, bankada rasik laiha poder atu husu demisaun ba membru governu ka Deputadu ida.
Ligadu ho kazu neebe kona Ministru Agio Pereira, Prezidente MORRENA nee hatoo mos preokupasaun kona-ba tendensia interese grupu nian neebe bele domina iha laran, ka kauza husi denunsia ma-fe neebe infiltra ona iha governu laran.
Husi situasaun nee, Cesar Valente hatoo ezijensia katak Deputadu sira neebe hatoo pedidu hanesan nee presiza mos atu deskonfia nuudar infiltradus ma-fe, tanba iha tendensia hodi prefere husu demisaun ema neebe denunsia aktus krime neebe tama iha nasaun laran.
Iha parte ketak, Observador Politika, Antonio da Silva hatoo mos nia hanoin katak kestaun neebe mosu iha nivel Parlamentu no Governu nee, presiza tratamentu neebe matenek hodi labele estraga estabilidade politika neebe eziste daudaun.
Tuir nia, komunikasaun interna no disiplina partidu mak sai xave prisipal atu evita espozisaun publiku neebe bele kria persepsaun la diak ba povu nia oin, hodi husu atu lideransa sira iha partidu laran tenke foti medidas urjente hodi bele solusiona difikuldade sira nee iha forum neebeloos nia laran.
Entretantu Akademista UNTL, Silvino de Araujo, hatete situasaun nee refleta dinamika politika neebe presiza halo reflesaun klean husi lideransa partidu sira.
Tuir nia, kestaun demisaun no diskusaun publiku kona-ba figura Governu nian labele husik livre deit, maibe tenke iha mekanizmu kontrolu internu neebe forte, hodi nunee labele kriadivizaun ka interpretasaun oin-oin husi publiku, liu-liu bainhira iha preokupasaun kona-ba interese grupu ka infiltrasaun ma-fe neebe bele ameasa ezistensia Estadu nian.
(car)
