BAUCAU, STLTIMORLESTE.com – Komisaun Nasional ba Eleisaun (CNE – sigla português) halao vizita ofisial ba sede partidu politiku sira iha Munisipiu Baucau.
Prezidente CNE, José Belo aprezenta, CNE nuudar orgaun independente neebe kontrola no monitoriza prosesu eleisaun sira iha Timor no konsidera eleisaun hotu hotu neebe realiza importante, fo tempu ba eleitores sira atu ezerse nia direitu hili nia lideransa ida ho demokratiku. Husi vizita nee, Prezidente nee konsidera sede ba partidu politiku sira importante tebes, tanba sede partidu nuudar fatin viveiru lider ba partidu ida atu prepara ba eleisaun sira neebe sei mai.
“Ba CNE primeira vez vizita partidu sira nia sede ba ligasaun servisu nian prepara ba eleisaun sira neebe sei tuir mai. Ita hotu hatene katak eleisaun Prezidensial iha Janeiru primeira ou segundu semana Prezidente sei fo sai data ba eleisaun nian,” hateten Prezidente CNE José Belo liu husi nia diskursu iha vizita ba sede Partidu Demokratiku (PD) iha Tirilolo Baucau, Kinta (02/07/2026).
Nia sublina, husi vizita nee atu haree kondisaoens sira kada partidu politiku sira nian iha Baucau, tanba eleisaun neebe sei mai iha eleisaun tolu kompostu eleisaun Prezidensial, eleisaun Munisipal hafoin hakat ba eleisaun Parlamentar.
Nia fundamenta, eleisaun tolu neebe sei akontese iha tinan oin eleisaun importante tebes, tanba nee CNE hakbesik aan ba sede partidu sira iha nivel munisipiu atu garante estabilidade iha eleisaun tolu refere.
“Iha vizita ida nee ita tenke prepara ho diak estabilidade sai fondasi ida oinsa atu lori partidu konkore ho diak responsabilidade fihir ema neebe loos,” Jose akresenta
Nia deklara, vizita CNE nian ba sede partidu sira iha nivel munisipal nuudar afirmasaun no enkorajamentu ba partidu sira fihir nia lideransa partidu ida neebe pontensial neebe iha kapasidade sai lideransa ba partidu ida, tanba Timor Leste antes nee involve deit iha CPLP, maibe atual too ona iha nivel internasional hanesan sai membru permanente iha ASEAN.
Nunee partidu sira tenke prepara ona kapasidade atu hamutuk ho nasaun sira husi ASEAN, neebe mos Timor Leste sei lidera Simera boot ida iha Timor.
“Entaun ita hahu fihir aan hola pozisaun neebe klaru, partidu sira investimentu laos deit iha asaun maibe Estadu apoiu orsamentu natoon ba estadu, tanba nee partidu hotu hotu tenke iha sede iha munisipiu,” José katak.
Nia deklara, iha Timor Leste partidu sira neebe asentu iha Parlamentu Nasional hetan orsamentu husi Estadu, tanba nee partidu ida tenke harii nia sede iha munisipiu hotu-hotu nuudar fatin ba kuadru militante sira hodi prepara no kompete.
Aleinde mos eleisaun munisipal neebe sei akontese iha tinan oin ba partidu sira neebe atu kompete tenke iha sede munisipal.
Iha fatin hanesan, Vise Prezidente Partidu Demokratiku iha Baucau, António José Lopes apresia ho politika CNE nian neebe vizita ona sede Partidu Demokratiku (PD) iha Baucau no rekonhese atual PD iha Baucau laiha sede permanente, tanba durante tinan naruk estrutura PD iha Baucau utiliza deit uma privadu sai sede ba PD.
“Ami rekonhese primeiru ami nia sede, tanba nee ami sei esforsu ba sede permanente para ami halao atividade enkontru sira loro-loron ba eleisaun munisipal ami prontu, tanba ami nia estrutura too ona iha baze,” António komenta.
Entretantu vizita CNE nian ba sede partidu sira iha Munisipiu Baucau iha loron 02 Julhu nee, vizita ona sede Partidu KHUNTO, PLP, PD no CNRT, enkuantu FRETILIN seidauk.
(tom)
