QUELICAI, STLTIMORLESTE.com – Partidu Kongresu Nasional Rekonstrusaun Timorense (CNRT – sigla português) apoiu material konstrusaun ba kapela Sagrada Coração de Jesus Kaikobi-Isi, iha Suku Lacoliu, Postu Administrativu Quelicai, Munisipiu Baucau.
Koordenador KP Departamentu Asuntu Parlamentar Luis Nascimento esplika, apoiu refere nuudar atividade karitativas hatan ba sarani sira husi kapela Sagrada Coração de Jesus Kaikobi-Isi, relasiona konstrusuan kapela refere neebe nia progresu fiziku seidauk atinji 100%, tanba nee partidu CNRT konsidera sarani sira husi kapela Sagrada Coração de Jesus Kaikobi-Isi nia proposta apoiu material konstrusuan, hanesan kalen, sementi, tinta balde, raihenek no seluk tan, inklui sei apoiu tan ilhas Sagrada Coração de Jesus bainhira konstrusaun kapela refere atinji 100%.
Nia argumentu, apoiu refere nuudar asaun kontribui ba dezenvolvimentu parte relijiozu nian iha baze atu sarani sira hametin espiritu fiar nian.
“Mezmu ita iha ramu kiik oan ida mais ita nia responsabilidade boot oinsa kontribui atu hametin nafatin unidade iha komunidade sira hametin espiritu serve ninian nee mak partidu CNRT nian hanoin,” hateten Koordenador KP Departamentu Asuntu Parlamentar Luis Nascimento ba jornalista sira hafoin remata sesaun entrega material konstrusuan ba sarani sira iha kapela Sagrada Coração de Jesus Kaikobi-Isi, Sabadu (07/06/2026).
Nia sublina, atividade karitativas husi partidu CNRT apoiu material konstrusuan ba kapela, laos foin akontese iha kapela Sagrada Coração de Jesus Kaikobi-Isi, maibe partidu CNRT mos apoiu ona apoiu hanesan ba kapela ida iha Munisipiu Ermera.
Nia komenta, Partidu CNRT liu husi KP Departamentu Asuntu Parlamentar kontinua iha politika halao atividade karitativas bainhira iha pedidu apoiu husi simpatizantes sira ba partidu CNRT.
“Mezmu sasan nee kiik oan mais hanesan organizasaun mahon iha partidu CNRT kontinua halao ita nia funsaun atu nunee hametin nafatin komprimisiu neebe iha,” katak Luis Nascimento.
Iha fatin hanesan, sarani Katolika husi kapela Sagrada Coração de Jesus Kaikobi-Isi, Juvito Freitas aprezenta, material konstrusuan neebe partidu CNRT apoiu ba kapela Sagrada Coração de Jesus Kaikobi-Isi mak hanesan kalen tahan 27, sementi saka 80, tinta balde rua, raihenek no seluk tan, tanba kapela refere sarani sira inisiativa liu husi kontribuisaun osan sosan material sira hahu ona konstrusaun, maibe seidauk finaliza, nunee diriji proposta ba partidu refere hodi fo apoiu materia sira atu finaliza konstrusuan kapela refere.
“Apoiu ida nee diresaun husi partidu CNRT nian. Ami sente kontente tebes, tanba apoiu ona ami, ami sei halo diak liu tan,” Juvito Freitas espresa.
Enkuantu Padre Parokia Santa Teresinha Quelicai, David Savio SDB sente kontente no agradese ba partidu CNRT neebe apoiu ona material konstrusuan ba kapela Sagrada Coração de Jesus Kaikobi-Isi hodi Parokia hamutuk ho sarani bele dezenvolve kapela refere diak liu tan.
“Husu sarani sira neebe iha nee, kaundu simu ona apoiu husi Estadu no Partidu material sira nee uza didiak ba atu nunee dezenvolve ita nia kapela nee hodi nunee ita uza ba selebrasaun sira neebe halao iha fatin ida nee,” dehan nia.
Entretantu bainhira selebrasaun misa iha kapela refere sei partisipa husi sarani sira husi Ossolia, Laumana no Nucububu.
(tom)
