DILI, STLTIMORLESTE.com — Conselho Imprensa ensera atividade formasaun Jornalizmu Fundamentál ne’ebé hala’o durante loron lima, husi segunda-feira, 5 to’o Sesta-feira, 9 Outubru 2026, iha salaun treinamentu Conselho Imprensa, Dili.
Formasaun ne’e realiza liuhusi kooperasaun entre Conselho Imprensa no ABC ID, ho objetivu atu hasa’e koñesimentu no kapasidade partisipante sira ne’ebé prepara an atu sai jornalista profisionál.
Diretór Ezekutivu Conselho Imprensa, António Dias, iha serimónia enseramentu, hato’o agradese ba ABC ID tanba fasilita formasaun ne’e, no ba fasilitadór sira ne’ebé fahe sira-nia esperiénsia ba partisipante sira.
“Hau lori Conselho Imprensa nia naran, dahuluk hau hato’o agradese ba ABC ID tanba fasilita ona formasaun ida-ne’e. Daruak, hau hakarak agradese mos ba fasilitadór sira tanba sira-nia korajen no laran-luak atu fahe esperiénsia ba ita-nia alin sira ne’ebé sei sai jornalista profisionál,” António Dias afirma.
Nia subliña katak, futuru jornalizmu Timor-Leste nian depende ba jornalista foun sira, ne’ebé tenke aplika koñesimentu no esperiénsia ne’ebé sira hetan durante formasaun.
“Futuru jornalizmu Timor-Leste nian iha imi boot sira-nia liman. Atu jornalizmu sai di’ak, imi tenke aproveita buat hotu ne’ebé imi aprende durante semana ida-ne’e kona-ba Jornalizmu Fundamentál,” nia dehan.
António Dias mós husu ba partisipante sira atu rai no dezenvolve koñesimentu ne’ebé sira hetan, determina sira-nia vizaun no komprende razaun ne’ebé halo sira hakarak sai jornalista.
Nia enfatiza katak, korajen importante tebes iha profisaun jornalizmu, tanba jornalista presiza korajen atu ultrapasa dezafiu sira ne’ebé hasoru iha prosesu hala’o knaar.
Iha parte ikus, Diretór Ezekutivu Conselho Imprensa ne’e hato’o votos susesu ba partisipante hotu iha sira-nia karreira futuru hanesan jornalista, no ho agradesimentu ba parte hotu ne’ebé kontribui ba realizasaun formasaun ne’e, nia taka ofisialmente atividade ne’ebé hala’o durante loron lima.
(leo)
