DÍLI, STLTIMORLESTE.com — Kompetisaun futebol Copa Instituto Superiór Dom Bosco (ISDB) 2026 remata ona, FC Villa Ave Maria sai hanesan kampeaun.
Kompetisaun ne’e komesa ho partisipasaun hosi klubu 20, ne’ebé halibur hosi bairu no parókia sira iha área Parókia Maria Auxiliadora, Comoro, Dili.
Depois liu hosi prosesu kompetisaun, klubu rua mak konsege hakat ba final, mak FC Villa Ave Maria no FC Mãe da Graça. Iha final ne’ebé hala’o iha Sesta-feira (18/09/2026), FC Villa Ave Maria konsege sai kampeáun Copa ISDB tinan 2026.
Xefe Estudantil Institutu Superior Dom Bosco, ne’ebé reprezenta Konsellu Estudante, hato’o agradese ba parte hotu ne’ebé fó apoiu ba realizasaun kompetisaun ne’e, liuliu ba Reitor ISDB, Padre Manuel, korpu dosente, MESCC, árbitru sira no Komisaun Organizadora.
Nia hateten katak, atividade desportu ne’e la’ós de’it atu buka vensedor, maibé mos atu hametin amizade no aprende respeitu entre jovem sira.
Nia mos aprezia ba ekipa hotu ne’ebé partisipa, liuliu ekipa rua ne’ebé konsege to’o final. Maski iha jogu ida tenki iha ekipa manan no ekipa lakon, ida ne’e la’ós sai barreira ba jogador sira atu kontinua partisipa iha kompetisaun sira seluk iha futuru.
Iha parte seluk, Reitor Institutu Superior Dom Bosco, Padre Manuel Pintu, hato’o parabéns ba ekipa hotu ne’ebé partisipa iha Copa ISDB 2026.
Padre Manuel hateten, objetivu prinsipál hosi kompetisaun ne’e la’ós de’it kona-ba rezultadu iha kampu, maibé mos atu kria amizade, halibur jovem sira no hametin unidade no dame iha área Parókia Maria Auxiliadora, Comoro.
Nia mos apresia atitude desportiva hosi jogador sira durante kompetisaun. Maski iha jogu dala ruma mosu konflitu ki’ik, jogador sira konsege kontrola sira-nia an no evita problema ne’ebé bele sai boot.
Padre Manuel hato’o mos obrigadu no agradese ba MESCC, Komisaun Organizadora, Institutu Superior Dom Bosco no parte hotu ne’ebé fó apoiu ba realizasaun Copa ISDB 2026. Nia hein katak kompetisaun ne’e bele kontinua iha tinan oin mai.
Enkuantu reprezentante MESCC, Anselmo Xavier hateten katak, MESCC sei kontinua fó apoiu ba atividade sira ne’ebé bele kontribui ba dezenvolvimentu kapasidade intelektual no formasaun karakter jovem sira.
“Atividade hanesan desportu importante tanba formasaun jovem sira la’ós de’it atu dezenvolve kapasidade akademika, maibé mos atu forma komportamentu, disiplin no responsabilidade, nune’e bele sai jovem ne’ebé forte no kontribui ba nasaun”.
Nia mos hato’o parabéns ba ekipa rua ne’ebé konsege to’o final, no hateten katak prosesu hosi ekipa 20 to’o ekipa rua iha final fó oportunidade ba jogador sira atu hetan esperiénsia no aprende malu.
Anselmo subliña katak, jogador diak la’ós de’it tanba nia talentu rasik, maibé mos tanba esperiénsia ne’ebé nia hetan hosi kolega no adversáriu sira. Esperiénsia ne’e bele sai hanesan baze importante atu dezenvolve talentu no prepara jogador sira ba futuru.
Iha rezultadu ikus Copa Institutu Superior Dom Bosco 2026, FC Villa Ave Maria ocupa primeira lugar no sai kampeaun, FC Mãe da Graça iha segunda lugar, enkuantu FC Humbuti ocupa terceira lugar.
(leo)
