DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguidu inisial AdR neebe dada eletrisidade ilegal iha nia uma neebe lokaliza iha Munisipiu Ermera.
Iha indisus sufisiente katak, iha loron 14 fulan Julho tinan 2022, iha tuku 11h00, iha aldeia Tugluru, Suku Lauala, Gleno.
Iha tempu ida neeba xefe seksaun EDTL Munisipiu Ermera hamutuk ho ekipa ida kompostu ema nain 6 halo inspeksaun tama sai uma iha Munisipiu Ermera, hodi kontrola linha Eletrisidade ba iha konsumidores sira nia uma.
Iha oras refere ekipa to iha area Tugluru, observa katak, arguidu halo ligasaun illegal fiu metan husi EDTL.
Deskobre tiha katak, ligasaun direta no illegal, xefe equipa esplika ba arguidu katak kondisaun iha ita boot nia linha eletrisidade nee ita boot halo ligasaun direta ida nee fo perigo ba familia, maibe arguidu lasimu ho esplikasaun sira hodi halo ameasas ba ekipa refere.
Arguidu ho nia familia mos halao asaun hodi ataka ekipa EDTL. Tamba razaun nee sira hotu ekipa EDTL ho nia membru sira retira kedas husi arguidu nia uma, no lori kedas kuadru prepago no lakonsege halao servisu ho maximu.
Konskuensia husi arguidu nia hahalok ho nia membru sira lakonsege halo inspeksaun ho maximu, tanba hetan presaun no impedimentu husi arguidu.
Arguidu pratika nia hahalok ho forma livre, deliberada ho konsiensia rasik halo presaun no ameasas grave liu husi liafuan ameasas sira nee, hodi impede ekipa EDTL atu halao inspeksaun ba linha eletrisidade iha arguidu nia uma ho maximu.
Arguidu hatene hela katak, halo asaun ameasa ho violensia no impede servisu funsionariu tekniku EDTL munisipiu Ermera nian, nudar hahalok krime no lei proibe no sei hetan kastigu, maibe arguidu hakarak halo nafatin hanesan saida mak deskreve iha leten hodi impede servisu EDTL nian.
Ho hahalok sira nee konstitui arguidu nudar autor material ho forma konsumada ba Pratika krime ida Obstrusaun ba Autoridade Publika tuir artigu 243 husi Kodigu Penal.
Ba prosesu ida nee, arguidu notifika edital, tanba nee arguidu reprezenta husi nia Defeza. Ho nunee depois lee tiha akuzasaun, Tribunal deside hodi rona kedan deklarasaun husi sasin sira.
Sasin Adolfo Inacio da Silva Maia deklara katak, momentu neeba sira nain tolu maka ba iha arguidu nia uma, husi inspesaun neebe sira halo no hare prepagu neebe iha liga ilegal.
Sasin deklara, sira hare katak arguidu liga ahi ilegal, ho nunee sira informa ba arguidu atu ba selu multa. Maibe arguidu la selu multa, tanba nee maka sira foti desizaun hodi tesi tiha fiu, atu arguidu labele asesu ahi.
Sasin deklara, depois tesi tiha fiu to agora sasin sira la halo inspesaun ba arguidu nia uma, maibe se arguidu asesu ahi karik ida nee bele liga husi vizinu sira.
Alende nee, sasin Cristovao Sarmento Madera deklara katak, momentu neeba sira halo inspesaun deteta katak, arguidu liga ahi la liu husi kontador neebe EDTL sira instala ba.
Sasin deklara, momentu neeba sira indentifika ilegal fo chama ba arguidu atu selu multa, maibe arguidu la kordena hodi selu. Ho ida nee maka sasin sira hetan orientasaun husi sira nia Kordenador hodi tesi fiu neebe liga ba uma.
Sasin deklara, momentu neebe sira informa ba iha arguidu fo prazu loron lima atu ba selu multa, maibe durante loron 5 arguidu laba selu multa, ho ida nee maka sira tesi fiu.
Rona tiha sasin sira nia deklarasaun, Tribunal husu ba iha Ministeriu Publiku no Defeza, atu tama ba iha alegasaun.
Liu husi alegasaun, Prokurador Ricardo Leite deklara katak, arguidu la marka prejensa fiksa edital. MP konsidera arguidu nia aktu la iha ofensa ruma, maibe lia fuan neebe arguidu hasai husi nia ibun, afeta pisikolojikamente ba iha sasin sira neebe halao servisu iha terenu.
Tanba nee MP mantein ho akuzasaun neebe iha, husu Tribunal atu aplika pena prizaun tinan rua, suspende tinan rua ba arguidu. No MP husu ba Tribunal, atu fiksa ba arguidu selu multa tuir dokumentus neebe EDTL fornese ba arguidu.
Enkuantu husi parte defeza Defensor Publiku Jose Guterres deklara katak, arguidu hasai lia fuan ba sasin sira, tanba arguidu la satisfaz sasin sia tesi fiu neebe iha. Tanba nee defeza konsidera, arguidu nia aktu la prense ba krime neebe iha. Ho nunee Defeza solisita ba iha Tribunal Kolektivu, atu absolve arguidu husi krime neebe MP akuza.
Rona tiha alegasaun, Tribunal adia ba loron seluk hodi rona desizaun.
Audensia julgamentu nee, prezide husi Juiz Kolektivu, Ersilia de Jesus, Ana Paula, Jose Maria, MP reprezenta husi Prokurador Ricardo Leite, arguidu hetan asistensia legal husi Defensor Publiku Jose Guterres.
(ter)
